جہلم: تجاوزات مافیا سرگرم، شہر کی سڑکیں سکڑ گئیں۔ انتظامیہ کے بلند و بانگ دعوے زمین بوس ، شہریوں کا ایڈمنسٹریٹر میونسپل کمیٹی سے نوٹس لینے کا مطالبہ۔
تفصیلات کے مطابق شہر کی معروف سڑکوں ، جادہ روڈ، اولڈ جی ٹی روڈ، کچہری روڈ، کمیلا روڈ، سول لائن روڈ، ٹاہلیانوالہ روڈ، روہتاس روڈ،مشین محلہ روڈ سمیت جی ٹی روڈ سروس روڈ پر شہریوں کا پیدل چلنا دشوار ہو کر رہ گیا ہے۔
تجاوزات مافیا نے مستقل بنیادوں پر پنجے گاڑ رکھے ہیں ، اندرون شہر کی سڑکوں اور چوک چوراہوں میں قائم ہونے والی تجاوزات شہریوں کے لئے وبال جان بن چکی ہے ،شہرکی سڑکوں پر ٹریفک کا جام ہونا روزانہ کا معمول بن چکا ہے، میونسپل کمیٹی کے شعبہ انکروچمنٹ کے ذمہ داران کی عدم دلچسپی و عدم توجہی کے باعث تجاوزات مافیا بے لگام ہو چکا ہے۔
جہلم شہر کی سڑکوں پر صبح ہوتے ہی بااثر افراد انتظامی افسران کی پشت پناہی کیوجہ سے سڑکوں کے دونوں اطراف دکانیں سجا لیتے ہیں ، مذکورہ سڑکوں پر شہریوں کو آمدورفت میں شدید دشواری کا سامنا کرنا پڑتا ہے ، تجاوزات مافیا علی الصبح فوراً سڑکوں پر قبضہ جما لیتے ہیں۔
انتہائی باوثوق ذرائع سے معلوم ہوا ہے کہ میونسپل کمیٹی کے ملازمین تجاوزات قائم کرنے والے دکانداروں سے روزانہ کی بنیاد پر تہہ بازاری کے نام پر پیسے وصول کرتے ہیں ، جس کی وجہ سے تجاوزات مافیا بلا خوف وخطر سڑکوں پر تجاوزات قائم کرکے کارروباری سرگرمیاں جاری رکھے ہوئے ہیں۔
شہریوں نے نگران وزیراعلیٰ پنجاب، چیف سیکرٹری پنجاب، ایڈمنسٹریٹر میونسپل کمیٹی سے مذکورہ صورتحال کا نوٹس لینے کا مطالبہ کیاہے ۔
