جہلم: ڈپٹی کمشنر جہلم میثم عباس نے ریور روڈ اور تحصیل روڈ کا اچانک دورہ کیا اور دونوں علاقوں میں قائم تجاوزات، خصوصاً کباڑیوں کے غیر قانونی کباڑ خانوں کا نوٹس لیتے ہوئے فوری خاتمے کا حکم جاری کر دیا۔
ڈی سی جہلم نے ریور روڈ باغ محلہ اور تحصیل روڈ پر سڑکوں کے کنارے لگے کچرے کے ڈھیروں اور کباڑ خانوں پر شدید برہمی کا اظہار کیا۔ انہوں نے واضح ہدایات جاری کیں کہ تمام کباڑی حضرات اپنا سامان دکانوں کے اندر منتقل کریں اور سڑک کنارے سے ہر قسم کی تجاوزات اور غیر ضروری سامان فوری طور پر ہٹا دیا جائے۔
ڈپٹی کمشنر نے متعلقہ اداروں کو سختی سے ہدایت کی کہ صفائی ستھرائی کو یقینی بنایا جائے تاکہ شہریوں کو صاف ماحول فراہم کیا جا سکے۔ انہوں نے کہا کہ شہر کی خوبصورتی اور عوامی سہولت کے لیے تجاوزات کا خاتمہ ناگزیر ہے اور اس سلسلے میں کسی قسم کی کوتاہی برداشت نہیں کی جائے گی۔
