سوہاوہ: ڈومیلی کے علاقے دھمالہ میں ٹیلی تعلیم کے زیرِ نگرانی چلنے والے پرائمری سکول میں ایک روزہ سائنسی ماڈلز کی شاندار نمائش کا انعقاد کیا گیا۔ تقریب کا آغاز تلاوتِ قرآنِ پاک اور نعتِ رسولِ مقبولؐ سے ہوا، جس کے بعد طلبہ و طالبات نے خوبصورت ٹیبلوز پیش کیے۔
تقریب کے مہمانِ خصوصی راجہ عبیداللہ (سابق زکوٰۃ کمیٹی بڑاگواہ) تھے۔ اسکول پہنچنے پر بچوں نے پھولوں کے گلدستے پیش کر کے مہمانوں کا شاندار استقبال کیا۔ اس موقع پر ڈسٹرکٹ پروگرام منیجر ٹیلی تعلیم جہلم ندیم افضال، کلسٹر کوآرڈینیٹر بلال آزاد، ماسٹر محمد لیاقت، نمبردار راجہ ایوب خان، میڈیا نمائندگان اور بچوں کے والدین بھی بڑی تعداد میں موجود تھے۔
نمائش میں سائنس اور ٹیکنالوجی سے متعلق جدید ماڈلز پیش کیے گئے جن میں تمام موسموں کے ماڈلز، خانہ کعبہ اور دیگر تعلیمی ماڈلز شامل تھے۔ بچوں نے مہمانوں کو ماڈلز کا تفصیلی وزٹ کرایا اور ان کی تیاری سے متعلق آگاہ کیا۔ مہمانوں اور والدین نے بچوں کی محنت اور تخلیقی صلاحیتوں کو سراہا۔
سپورٹس گالا اور دیگر سرگرمیوں میں نمایاں کارکردگی دکھانے والے طلبہ و طالبات میں انعامات بھی تقسیم کیے گئے۔
اس موقع پر کلسٹر کوآرڈینیٹر بلال آزاد اور ڈسٹرکٹ پروگرام مینیجر ندیم افضال نے خطاب کرتے ہوئے کہا کہ ٹیلی تعلیم کو سرکاری اسکولوں میں کام کرتے ہوئے دو سال مکمل ہو چکے ہیں، اور اس دوران تعلیمی ماحول میں نمایاں بہتری آئی ہے۔ والدین کے مثبت ردِعمل کی وجہ سے داخلوں میں اضافہ ہوا، مدارس میں ای-ڈی ٹیک سسٹم کی تنصیب اور لائبریری کارنرز کی سہولت بھی فراہم کی گئی۔ جن اسکولوں میں تعداد زیادہ بڑھی وہاں پرائمری کو ایلیمنٹری میں اپ گریڈ کیا گیا۔
انہوں نے مزید کہا کہ اس ترقی کے پیچھے اساتذہ کی محنت، والدین کا اعتماد اور کمیونٹی کا تعاون شامل ہے۔ ٹیلی تعلیم دینی اور دنیاوی تعلیم کی معیاری فراہمی کے لیے بھرپور کوششیں جاری رکھے ہوئے ہے۔
پرنسپل حرا شہر بانو نے اپنے خطاب میں تمام مہمانوں اور والدین کا شکریہ ادا کرتے ہوئے کہا کہ نمائش میں شامل تمام ماڈلز مختلف کلاسز کے بچوں نے مل کر تیار کیے ہیں اور یہ انہی موضوعات پر مبنی ہیں جو ان کی سائنس کی کتابوں میں شامل ہیں۔ انہوں نے طلبہ کی مہارت اور دلچسپی کو سراہتے ہوئے امید ظاہر کی کہ یہ سرگرمیاں بچوں کے تعلیمی سفر میں اہم کردار ادا کریں گی۔
