مدینہ منورہ: سعودی عرب نے مدینہ منورہ میں روضہ رسول ﷺ پر زائرین کی حاضری سے متعلق ضابطہ اخلاق کا اعلان کردیا۔
تفصیلات کے مطابق وزارتِ حج و عمرہ کی جانب سے جاری کردہ بیان میں سعودی حکام نے روضہ مبارک جانے کے خواہشمند مسلمانوں کو مطلع کیا ہے کہ ضابطہ اخلاق کی پابندی کریں، جن کے تحت زائرین کو مقدس مقام پر پہنچنے سے پہلے پیشگی ریزرویشن حاصل کرنا ہوگی اور مقررہ وقت پر حاضر ہونا ہوگا۔
روضہ شریف میں داخل ہونے پر آنے والے زائرین کو اپنی آواز بلند نہیں کرنی چاہیئے، اپنے ہمراہ کھانا نہ لائیں، تصاویر لینے یا فلم بندی میں مصروف ہونے سے گریز کریں اور مختص وقت سے زیادہ دیر روضہ مبارک میں نہ رکیں۔
As we visit the venerable Rawdah of the Prophet, let us maintain the loftiest norms of etiquette and take a moment to truly comprehend the immense sanctity and significance of this sacred place.#Makkah_in_Our_Hearts pic.twitter.com/h96d35Ai4B
— Ministry of Hajj and Umrah (@MoHU_En) October 3, 2023
بتایا گیا ہے کہ حرمین شریفین کے انتظامی امور کے نگران ادارے صدارت عامہ برائے امور حرمین شریفین کی جانب سے مسجد نبوی ﷺ اور مسجد الحرام میں نمازیوں اور زائرین کو فول پروف خدمات اور سہولیات کی فراہمی کا سلسلہ جاری ہے۔
صدارت عامہ کی طرف سے گزشتہ ایک ہفتے کے دوران مسجد نبوی ﷺ میں 56 لاکھ سے زائد زائرین اور نمازیوں کو خدمات کی فراہمی کو یقینی بنایا گیا، ان سہولیات میں روضہ رسول ﷺ پر زئراین کی حاضری کو منظم کرنے کی سہولت بھی شامل ہے، جن کی بدولت ایک ہفتے کے دوران 47 لاکھ 3 ہزار 821 زائرین نے روضہ رسول صلی اللہ علیہ وآلہ وسلم اور آپ صلی اللہ علیہ وآلہ وسلم کے صاحبین کے مزارات پر حاضری اور دردو و سلام پیش کرنے کی سہولت پیش کی گئی۔
معلوم ہوا ہے کہ گزشتہ 7 دنوں میں پانچوں نمازوں کے دوران 56 لاکھ 40 ہزار 231 نمازیوں نے مسجد نبوی ﷺ میں نمازیں ادا کیں، 34 ہزار 048 زائرین نے روضہ رسول ﷺ میں نوافل ادا کیے جب کہ 1 لاکھ 10 ہزار 436 زائرین کو روضہ رسول ﷺ پر حاضری کے دوران فوری ترجمہ کی سہولت فراہم کی گئی۔
14 ہزار 096 عمر رسیدہ اور معذور افراد کو وہیل چیئرز کی سہولت دی گئی، اس کے علاوہ 4 ہزار 844 زائرین کو مواصلاتی چینلز کے ذریعے راہ نمائی فراہم کی گئی، گزشتہ ایک ہفتے کے دوران مسجد نبوی ﷺکی نمائش کو 3 ہزار 383 زائرین نے دیکھا جب کہ مسجد نبوی ﷺ کی لائبریری سے 10 ہزار 747 زائرین مستفید ہوئے۔
