جہلم: مر کزی انجمن تاجران کے صدر چوہدری محمد عارف ، صدر صرافہ یونین راجہ محمد سعید کی قیادت میں جہلم کے تاجر رہنماؤں کے وفد نے نوتعینات ڈپٹی کمشنر سیدہ رملہ علی اور ڈسٹرکٹ پولیس آفیسر جہلم ناصر محمود باجوہ سے ان کے دفتر میں ملاقات کی۔
اس موقع پر صدر مرکزی انجمن تاجران چوہدری محمد عارف ، راجہ محمد سعید ، ظہور عالم بٹ، طارق دول،ناصر ڈار، ندیم اختر بوبی ، چوہدری محمد شعیب، شیخ ذوالفقار علی کاشف، میاں مدثر حفیظ، شیخ ندیم اصغر، عامر سلیم میر، چوہدری سعید احمد، طاہر ایوب سیٹھی، خواجہ ناصر ڈار سمیت دیگر تاجر رہنما بھی ان کے ہمراہ تھے۔
چوہدری محمد عارف اور راجہ محمد سعید نے نئی تعینات ہونے والی ڈپٹی کمشنر سیدہ رملہ علی کوجہلم کی تاجر برادری کی طرف سے بھرپور تعاون کی یقین دہانی کراتے ہو ئے کہا کہ جہلم کی تا جر برادری مثبت اور تعمیری سرگرمیوں کے فروغ کیلئے ان کے شانہ بشانہ کھڑی ہوگی۔
انہوں نے کہا کہ ہمیں امید ہے کہ آپ کی قیادت میں اہلیان ضلع جہلم اور تا جر برادری کو درپیش مسائل جن میں جہلم کے مضافاتی و دیہی اور شہری علاقوں میں بجلی ،سوئی گیس کے کنکشنزکے حصول میں درپیش رکاوٹوں کا خا تمہ ،ٹریفک کے نظام کی بہتری ،مارکیٹ کمیٹی کو حقیقی تاجر وں کی نمائندگی کے ساتھ ازسر نو فعال کر نا،حقیقت پر مبنی ریٹ لسٹوں کی تیاری اور ناجائز منافع خوری جیسے اقدامات کے خاتمے کے لیے مشترکہ طور پر کام کرنا ہوگا۔
اس موقع پر گفتگو کر تے ہوئے ڈپٹی کمشنر سیدہ رملہ علی نے کہا کہ ان کے دفتر کے دروازے شہریوں اور تا جر برادری کے لیے ہروقت کھلے ہیں وہ شہریوں اور تاجروں کے ساتھ مل کر ضلع جہلم کے مسائل کے خاتمے کے لئے پر امید اور پر عزم ہیں۔
ڈی پی او جہلم ناصر محمود باجوہ نے کہا کہ تاجرکسی بھی ملک کی معشیت میں ریڑھ کی ہڈی کی حیثیت رکھتے ہیں اور ان کا تاجروں ، عوام اور انتظامیہ میں ایک اچھا مقام ہے جبکہ وہ ضلع میں پائی جانے والی برائیوں کو ختم کرنے کے لیے پولیس کے ساتھ ملکر اپنا کردار ادا کر سکتے ہیں۔
خواجہ ناصر ڈار اور ناہید خان نے ڈی پی او جہلم کو ٹریفک کے ضمن میں مشکلات بتاتے ہوئے کہا کہ وہیکل لفٹر ٹریفک میں رکاوٹ ڈالنے والی اور غیر قانونی پارکنگ کرنے والی گاڑیوں کو تو اٹھاتے ہیں جبکہ موٹر سائیکلوں پر یہ ظلم بند کیا جائے ۔اسی طرح مین بازار ، چوک اہلحدیث ، کناری بازار ، راجہ بازار ، سول لائنز اور نیا بازار میں چنگ چی رکشہ جات کا داخلہ بند کر کے ٹریفک کے معمول کو بہتر بنایا جائے جس پر ڈی پی اوجہلم نے کہا کہ اس پر بہت جلد عمل کیا جائے گا۔
مرکزی انجمن تاجران تاجران لورز گروپ کے صدر محمد عارف چوہدری نے ڈی پی اوجہلم کو پھولوں کا گلدستہ بھی پیش کیا اور ضلع میں جرائم کے خاتمہ کے لیے ان کی بھرپور کوششوں کو سراہا۔
ڈی پی او جہلم ناصر محمود باجوہ نے کہا کہ تاجر برادری اور جہلم کے شہریوں کا تحفظ یقینی بنانے کے لئے حکومت پنجاب کی جانب سے جلد جہلم شہر کو سیف سٹی ٹیکنالوجی سے منسلک کیا جا رہا ہے۔
