جہلم میں جی ٹی روڈپر دو موٹرسائیکلوں کے مابین تصادم سے بچوں سمیت 4 افراد زخمی ہو گئے۔
تفصیلات کے مطابق یہ افسوسناک حادثہ جہلم کینٹ جی ٹی روڈ کے قریب پیش آیا، جہاں دو موٹرسائیکلوں کے درمیان خوفناک تصادم سے بچوں سمیت 4 افراد زخمی ہو گئے۔
ریسکیو ذرائع کے مطابق حادثہ اس وقت پیش آیا جب دو موٹرسائیکلیں تیز رفتاری کے باعث آپس میں ٹکرا گئیں، اطلاع ملتے ہی ریسکیو 1122 کی ٹیم موقع پر پہنچ گئی اور زخمیوں کو فوری ابتدائی طبی امداد فراہم کرنے کے بعد ڈسٹرکٹ ہیڈکوارٹر اسپتال جہلم منتقل کر دیا گیا۔
زخمی ہونے والوں میں محبوب ولد محمد اشرف، زوہیب ولد عبدالقیوم، سحر نور دختر اسامہ مبارک اور ہادی ولد اسامہ مبارک شامل ہیں۔
ریسکیو ذرائع کے مطابق زخمی زوہیب کے پاس موجود ایک ڈبہ جس میں 4 لاکھ 14 ہزار روپے نقد رقم اور ایک موبائل فون تھا، مکمل طور پر محفوظ رکھا گیا اور بعد ازاں اس کے والد عبدالقیوم کے حوالے کر دیا گیا۔
ریسکیو ٹیم کی بروقت کارروائی اور دیانتداری کو شہریوں نے سراہا ہے۔
