دینہ کے نواحی علاقہ میں سسرالیوں نے مبینہ تشدد کر کے بہو کو قتل کر دیا، شوہر اور سسر کی مبینہ قتل کو خودکشی کا رنگ دینے کی کوشش، پولیس نے شوہر اور سسر کو گرفتار کر لیا۔
تفصیلات کے مطابق جہلم کی تحصیل دینہ کے علاقہ پوٹھی میں خفیہ موبائل فون رکھنے کا الزام لگا کر سسرالیوں نے بہو کرن کو تشدد کا نشانہ بنانے کے بعد مبینہ طور پر قتل کر دیا، قتل کے بعد شوہر اور سسر نے لڑکی کی لاش کو پنکھے سے باندھ کر خودکشی کا رنگ دے دیا۔
لڑکی کے لواحقین نے الزام عائد کیا کہ مقتولہ کو تشدد کے ذریعے قتل کیا اور خودکشی کا ڈرامہ رچایا گیا۔ سسر اور شوہر نے قتل کرنے کے بعد لاش کو پنکھے سے لٹکانے کی کوشش کی ہے۔ سسر نے مقتولہ کو خفیہ موبائل فون رکھنے کا الزام عائد کر کے قتل کیا ہے۔
ایس ایچ او تھانہ دینہ نے جہلم اپڈیٹس کو بتایا کہ مقتولہ کی دو ماہ قبل مبشر جمیل سے شادی ہوئی تھی، مقتولہ کی لاش پنکھے سے لٹکی مشکوک حالت میں ملی ہے۔ پوسٹمارٹم مکمل ہوگیا ہے، رپورٹ آنا باقی ہے۔
تھانہ دینہ پولیس نے مقدمہ درج کر کے مقتولہ کے شوہر مبشر جمیل اور سسر محمد جمیل کو حراست میں لے لیا۔
