دینہ کے نواحی علاقہ میں ڈکیتی کی دلیرانہ واردات، پانچ نامعلوم مسلح نقاب پوش ڈاکوؤں نے فیملی کو یرغمال بنا کر طلائی زیورات، نقدی، موبائل فونز اور دیگر قیمتی اشیاء لوٹ لئے۔ ڈاکوؤں نے بکرا ذبح کرنے آئے قصابوں کو بھی نہ بخشا، قصابوں سے موبائل فون اور نقدی بھی چھین لی، ڈاکو واردات کے بعد فرار ہو گئے۔
تفصیلات کے مطابق جہلم کی تحصیل دینہ کے نواحی علاقہ چھنی گجراں میں چوہدری راشد کے گھر پانچ نامعلوم مسلح نقاب پوش ڈاکو داخل ہو گئے اور گھر میں داخل ہوتے ہی اہل خانہ کو اسلحہ کی نوک پر یر غمال بنا لیا۔ ڈاکوؤں نے جان سے مار دینے کی دھمکی دیتے ہوئے 15 لاکھ روپے مالیت کے طلائی زیورات، اڑھائی لاکھ کی نقدی، 4 عدد قیمتی موبائل فون اور دیگر اشیاء چھین لی۔
اسی دوران گھر میں بکرا ذبح کرنے آئے دو قصابوں کو بھی نہ بخشا، ان سے موبائل فون اور نقدی بھی چھین لی۔ ڈاکو واردات کے بعد کار میں باآسانی فرار ہونے میں کامیاب ہو گئے۔
پولیس تھانہ منگلا کینٹ نے رپورٹ درج کر کے ڈاکوؤں کی تلاش شروع کر دی۔
