جہلم: ایڈیشنل ڈپٹی کمشنر ریونیو جہلم سنیہ صافی کی زیرِ صدارت پلس کمیٹی کا ایک اہم اجلاس منعقد ہوا، جس میں پنجاب اربن لینڈ سسٹمز انہانسمنٹ پروجیکٹ (PLUS) کے تحت اب تک ہونے والے کام کی پیش رفت کا تفصیلی جائزہ لیا گیا۔
اجلاس سے خطاب کرتے ہوئے اے ڈی سی آر سنیہ صافی نے شرکاء کو آگاہ کیا کہ حکومت پنجاب، بورڈ آف ریونیو پنجاب اور ورلڈ بینک گروپ کے تعاون سے صوبہ بھر میں زمینی ریکارڈ کے نظام کو جدید خطوط پر استوار کرنے کے لیے پلس پروجیکٹ پر تیزی سے کام کر رہی ہے۔
انہوں نے واضح کیا کہ اس منصوبے کا بنیادی مقصد زمینی ریکارڈ کو درست، شفاف اور ڈیجیٹل بنانا ہے تاکہ ترقیاتی منصوبوں، بالخصوص ہاؤسنگ پروگرامز کے لیے موزوں زمین کی فوری اور درست نشاندہی ممکن ہو سکے۔
اے ڈی سی آر نے مزید کہا کہ یہ منصوبہ کسی بھی ناگہانی صورتحال یا ہنگامی بحران کی صورت میں حکومت کو بروقت اور مؤثر ردِعمل کی صلاحیت فراہم کرے گا، کیونکہ اس کے ذریعے زمین سے متعلق تمام ڈیٹا مکمل طور پر مستند اور ڈیجیٹل شکل میں دستیاب ہوگا۔
انہوں نے زور دیا کہ پنجاب اربن لینڈ سسٹمز کو بہتر بنانے کا یہ منصوبہ صوبے میں زمین کے انتظام و انصرام میں شفافیت لانے اور عام آدمی کو درپیش مسائل کے خاتمے میں کلیدی کردار ادا کرے گا۔
اجلاس کے اختتام پر اے ڈی سی آر سنیہ صافی نے متعلقہ محکموں اور افسران کو پراجیکٹ کے اہداف مقررہ مدت میں مکمل کرنے کی سخت ہدایات جاری کرتے ہوئے کہا کہ کسی بھی قسم کی سستی یا غفلت برداشت نہیں کی جائے گی۔
