پنجاب بورڈ نے میٹرک امتحانات سے متعلق اہم اعلان کردیا

پنجاب ایجوکیشن بورڈ نے اعلان کیا ہے کہ ضلع جہلم سمیت صوبے بھر میں میٹرک کے امتحانات شیڈول کے مطابق ہوں گے۔

آل پاکستان پرائیویٹ اسکولز ایسوسی ایشن (اے پی پی ایس اے) نے نگران وزیراعلیٰ پنجاب اور سیکرٹری ہائر ایجوکیشن کو لکھے گئے خط میں امتحانات کم از کم ایک ماہ مؤخر کرنے کی درخواست کی تھی۔

مرکزی صدرآل پاکستان پرائیویٹ اسکولز ایسوسی ایشن میاں شبیر احمد ہاشمی نے اپنے خط میں اسموگ کے منفی اثرات اور طلباء پر موسم سرما کی تعطیلات میں توسیع کا حوالہ دیتے ہوئے امتحانات ملتوی کرنے کی درخواست کی تھی۔

تاہم پنجاب ایجوکیشن بورڈ نے واضح کیا ہے کہ امتحانات تاخیر کا شکار نہیں ہوں گے اور شیڈول میں کوئی تبدیلی نہیں کی جائے گی۔

واضح رہے کہ میٹرک کے امتحانات یکم مارچ سے شروع ہونے والے ہیں۔ بورڈ آف انٹرمیڈیٹ اینڈ سیکنڈری ایجوکیشن (بی آئی ایس ای) لاہور نے بھی عارضی ڈیٹ شیٹ جاری کردی ہے۔

متعلقہ حکام کے مطابق میٹرک کے امتحانات میں کسی بھی قسم کی تاخیر سے اعلیٰ سطح کے امتحانات کے شیڈول متاثر ہوسکتے ہیں۔

خیبر پختونخوا حکومت نے حال ہی میں 14 مارچ سے شروع ہونے والے ایس ایس سی (نویں اور دسویں جماعت) امتحانات ایک ماہ کے لیے ملتوی کرنے کا اعلان کیا تھا۔

یہ فیصلہ والدین اور طلباء کی درخواستوں پر کیا گیا جنہوں نے رمضان کے مقدس مہینے میں امتحانات کے بارے میں اپنے خدشات کا اظہار کیا تھا۔

یہ بھی پڑھنا مت بھولیں

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button