جہلم: موسم سرما کی تعطیلات کے بعد جہلم سمیت پنجاب بھر میں سرکاری اور نجی تعلیمی ادارے کھل گئے، شدید سردی کی وجہ سے سکولوں میں بچوں کی حاضری معمول سے کم رہی۔
تفصیلات کے مطابق جہلم سمیت پنجاب بھر میں موسم سرما کی تعطیلات ختم ہونے کے ساتھ بچوں کی موجیں بھی ختم ہو گئیں، ضلع جہلم سمیت صوبے بھر کے نجی اور سرکاری تعلیمی ادارے 25 دن بعد آج دوبارہ کھل گئے ہیں.
پنجاب حکومت نے 18 دسمبر سے 31 دسمبر 2023ء تک موسم سرما کی تعطیلات کا اعلان کیا تھا تاہم موسم کی صورتحال کو دیکھتے ہوئے تعطیلات میں 9 جنوری 2024ء تک اضافہ کیا گیا۔
تعطیلات ختم ہونے کے باوجود سردی کی شدت میں کمی نہ آنے پر صوبائی حکومت کی جانب سے سکولوں کے اوقات کار تبدیل کر دیئے گئے.
نوٹیفکیشن کے مطابق 10 سے 22 جنوری تک تمام سکول صبح ساڑھے 9 سے دوپہر اڑھائی بجے تک کھلیں گے، نگران وزیر اعلیٰ پنجاب محسن رضا نقوی نے سردی سے بچنے کیلئے بچوں کو گرم ملبوسات پہننے کی ہدایت بھی کی ہے۔
