جہلم شہر کے قریب دریائے جہلم کے وسط میں قائم مبینہ عارضی ڈمپنگ پوائنٹ پر کوڑا کرکٹ جمع کیے جانے کے حوالے سے شہریوں نے شدید تشویش کا اظہار کرتے ہوئے متعلقہ اداروں سے فوری نوٹس لینے کا مطالبہ کیا ہے۔
مقامی شہریوں کے مطابق ستھرا پنجاب اتھارٹی کے تحت دریائے جہلم کے وسط میں اور قریبی آبادیوں کے نزدیک کوڑا کرکٹ جمع کیا جا رہا ہے، جس کے باعث علاقے میں بدبو اور ماحولیاتی آلودگی کے خدشات بڑھ رہے ہیں۔ ان کا کہنا ہے کہ دریا کے قریب کچرے کے ڈھیر نہ صرف ماحول کو متاثر کر رہے ہیں بلکہ صحتِ عامہ کے لیے بھی خطرات پیدا کر سکتے ہیں۔
شہریوں کا مؤقف ہے کہ تیز ہواؤں کے دوران پلاسٹک بیگز اور دیگر ہلکا پھلکا کچرا اردگرد کی آبادیوں میں پھیل جاتا ہے، جس سے مکینوں کو روزمرہ زندگی میں مشکلات کا سامنا کرنا پڑتا ہے۔ ان کے مطابق آبی ذخائر اور رہائشی علاقوں کے قریب اس نوعیت کی سرگرمیاں ماحولیاتی تحفظ کے تقاضوں سے ہم آہنگ نہیں۔
متاثرہ شہریوں نے مطالبہ کیا ہے کہ دریائے جہلم اور اس کے اطراف میں کوڑا کرکٹ پھینکنے یا جمع کرنے کے عمل کا فوری جائزہ لیا جائے، ماحولیاتی قوانین پر مؤثر عملدرآمد کو یقینی بنایا جائے اور اگر کسی قسم کی بے ضابطگی موجود ہو تو اسے فوری طور پر ختم کیا جائے۔
شہریوں نے ایڈوائزر صوبائی محتسب پنجاب، محکمہ ماحولیات اور دیگر متعلقہ حکام سے بھی مطالبہ کیا کہ وہ معاملے کا نوٹس لیتے ہوئے موقع کا معائنہ کریں، حقائق سامنے لائیں اور ماحول و عوامی صحت کے تحفظ کے لیے ضروری اقدامات کریں۔
