واقعہ معراج کمال معجزات مصطفی اور تسخیر ِکائنات کے بند دروازوں کے کھلنے کی ابتدا ہے، سید خلیل کاظمی

جہلم: سید خلیل حسین کاظمی نے کہا کہ واقعہ معراج کمال معجزات مصطفی اور تسخیر ِکائنات کے بند دروازوں کے کھلنے کی ابتدا ہے، اعلائے کلمہ حق اور توحید کی ترویج و اشاعت اور فروغ کے لئے اللہ رب العزت نے اپنے پیغمبروں کو معجزات سے نوازا۔

جہلم شہر کی سماجی، رفاعی، فلاحی و مذہبی شخصیت سید خلیل حسین کاظمی نے اپنے بیان میں کہا کہ معجزات کا انکار قرآن و سنت کی تعلیمات سے انکار ہے۔معراج کی شب کوئی چیز بھی پردہ غیب میں نہ رہی۔ آپ ﷺ نے مظاہرات حق و کون و مکاں کا بچشم مشاہدہ فرمایا۔

انہوں نے کہا کہ معراج کی شب آپ ﷺ کو قیامت تک کے ہونے والے واقعات کا علم عطا کر دیا گیا۔ سفرِ معراج کے دوران حضور سرور کونین ﷺ نے اللہ رب العزت کے جلال و جمال کی رعنائیاں اور لامکاں کی وسعتیں دیکھیں۔آپ ﷺنے تاقیامت ظہور پذیر ہونے والے واقعات کی جو نشاندہی فرمائی وہ تخیلات یا تصورات نہ تھے بلکہ عین حقیقت اور مشاہدات تھے جن کا اظہار تاوصال آپ ﷺ بتدریج فرماتے رہے۔

سید خلیل کاظمی نے کہا کہ اللہ رب العزت نے قرآن مجید میں ارشاد فرمایا اللہ اور اس کے رسول ﷺ کی اطاعت کرو کیونکہ اللہ رب العزت نے پیغمبر آخر الزماں ﷺ کو تمام علوم و معارف عطا فرما دئیے تھے، آپ ﷺ نے جو فرمایا وہ حق ہے۔

یہ بھی پڑھنا مت بھولیں

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button