جہلم: ڈپٹی کمشنر جہلم میثم عباس نے گورنمنٹ کالج آف کامرس بلال ٹاؤن کا دورہ کیا، جہاں کالج پرنسپل طارق عزیز، سینئر پروفیسر اصلاح الدین احمد اور حماد رضا اعوان نے ان کا پرتپاک استقبال کیا۔
پرنسپل نے ڈپٹی کمشنر کو کالج کے مختلف حصوں کا معائنہ کروایا اور تعلیمی سرگرمیوں کے حوالے سے تفصیلی بریفنگ دی۔ دورے کے دوران ڈپٹی کمشنر نے کالج میں جاری تدریسی معیار، انفراسٹرکچر، اور طلبہ کو فراہم کی جانے والی سہولیات کا جائزہ لیا۔
انہوں نے کالج کی انتظامیہ کو تعلیمی ماحول مزید بہتر بنانے کے لیے کی گئی کاوشوں کو سراہتے ہوئے خصوصی طور پر نئے پودے لگانے اور گرینری میں اضافے کی تعریف کی۔ انہوں نے کہا کہ تعلیمی ادارے نوجوانوں کی ذہنی اور اخلاقی تربیت کے مراکز ہوتے ہیں، اور ان کی بہتری کے لیے تمام وسائل بروئے کار لانے چاہئیں۔
ڈپٹی کمشنر میثم عباس نے اساتذہ پر زور دیا کہ وہ اپنی بھرپور محنت اور لگن سے طلبہ کی تعلیم و تربیت کریں تاکہ وہ مستقبل میں ملک و قوم کی ترقی میں اہم کردار ادا کر سکیں۔ انہوں نے کہا کہ نوجوان ہمارا سرمایہ ہیں اور ان کی معیاری تعلیم و تربیت ہی روشن پاکستان کی ضمانت ہے۔
انہوں نے کالج انتظامیہ کو ہدایت دی کہ تعلیمی معیار کو مزید بہتر بنانے کے لیے جدید تدریسی طریقے اپنائے جائیں اور طلبہ کی عملی تربیت پر بھی خصوصی توجہ دی جائے تاکہ وہ کامیاب پروفیشنل بن کر ملک کی خدمت کر سکیں۔ انہوں نے اس عزم کا اظہار کیا کہ ضلعی انتظامیہ تعلیمی ترقی کے لیے ہر ممکن تعاون فراہم کرے گی تاکہ جہلم کے تعلیمی ادارے مثالی کارکردگی کا مظاہرہ کر سکیں۔
