دینہ: اسسٹنٹ کمشنر دینہ محمد تیمور خان نے چیف آفیسر محمد فیصل اور انجینئر حافظ عامر کے ہمراہ دینہ مین بازار میں جاری ترقیاتی کاموں کا دورہ کیا اور منصوبے پر جاری کام کا تفصیلی جائزہ لیا۔
تفصیلات کے مطابق جہلم کی تحصیل دینہ میں اسسٹنٹ کمشنر محمد تیمور خان نے وزیراعلیٰ پنجاب مریم نواز شریف کی ہدایات کے تحت دینہ مین بازار کو ماڈرن بازار بنانے کے منصوبے کے تحت جاری ترقیاتی سرگرمیوں کا معائنہ کیا۔ اس دوران دکانداروں نے نکاسی آب، مین ہولز کی صفائی اور فرش کے پلستر کا کام مکمل نہ ہونے سے متعلق شکایات پیش کیں۔
شکایات پر اسسٹنٹ کمشنر محمد تیمور خان نے برہمی کا اظہار کرتے ہوئے متعلقہ حکام کو ہدایت جاری کی کہ تمام مسائل کو فوری طور پر حل کیا جائے اور ترقیاتی کام جلد از جلد مکمل کیے جائیں تاکہ تاجروں اور شہریوں کو مشکلات کا سامنا نہ کرنا پڑے۔
اسسٹنٹ کمشنر نے کمرشل مارکیٹ دینہ کا بھی دورہ کیا اور مارکیٹ کے فرنٹ سے 15 فٹ جگہ خالی رکھنے کی ہدایت کی تاکہ بازار میں کشادگی، خوبصورتی اور آمدورفت میں بہتری لائی جا سکے۔
بعد ازاں میڈیا سے گفتگو کرتے ہوئے اسسٹنٹ کمشنر محمد تیمور خان نے کہا کہ وزیراعلیٰ پنجاب مریم نواز شریف کی خصوصی ہدایات پر دینہ مین بازار کو جدید طرز پر ماڈرن بازار میں تبدیل کیا جا رہا ہے، جس کی تکمیل کے بعد یہ بازار خوبصورتی اور سہولیات کے اعتبار سے اپنی مثال آپ ہوگا۔
انہوں نے کہا کہ منصوبے کا مقصد شہریوں اور تاجروں کو بہتر سہولیات فراہم کرنا، نکاسی آب کے نظام کو بہتر بنانا اور بازار کو جدید تقاضوں کے مطابق ترقی دینا ہے تاکہ عوام کو زیادہ سے زیادہ آسانیاں میسر آ سکیں۔
