جب ہم ذہنی بیماری ڈیمنشیا کے بارے میں سنتے ہیں تو شاید کسی نے نہیں سوچا ہوگا کہ ٹیکسی یا ایمبولنس ڈرائیورز دوسروں کے مقابلے میں اس سے زیادہ محفوظ ہوتے ہیں۔
لیکن افراتفری سے بھری سڑکوں پر گاڑی چلانا آپ کے دماغ کو آخر صحت مند کیسے رکھتا ہے؟
نئی تحقیق سے پتہ چلتا ہے کہ کچھ لوگ غیرشعوری طور پر اپنے دماغ کو ڈیمنشیا کے خلاف دفاع کی ایک تہہ فراہم کرتے ہیں اور یہ لوگ خاص طور پر ٹیکسی اور ایمبولنس ڈرائیور ہیں۔
جی ہاں یہ سچ ہے، ٹریفک سے بچتے بچاتے اور شہر کی بھول بھلیاں سڑکوں سے گزرنے والے لوگوں کے ذہن وقت کے ساتھ ساتھ صحت مند ہوجاتے ہیں۔
سائنسدانوں نے متعدد مطالعات پر مبنی ڈیٹا کا تجزیہ کیا اور دریافت کیا کہ ٹیکسی اور ایمبولینس ڈرائیوروں میں ڈیمنشیا سے موت کا خطرہ تقریباً سب کے مقابلے میں سب سے کم ہوتا ہے۔
تفصیلات کے مطابق عام آبادی کا ڈیمنشیا سے مرنے کا خطرہ 1.69 فیصد ہوتا ہے جبکہ ٹیکسی ڈرائیوروں میں یہی خطرہ صرف 1.03 فیصد اور ایمبولینس ڈرائیوروں میں 0.74 فیصد ہوتا ہے۔
سائنسدانوں کا کہنا ہے کہ یہ ایک بہت بڑا فرق ہے جو ظاہر کرتا ہے کہ راستے کو یاد رکھنا اور زیادہ دیر تک ڈرائیونگ کرنا دماغی بیماری سے بہتر قوت مدافعت کی کلید ثابت ہو سکتا ہے۔
