جہلم پولیس کی ماہ مارچ کارکردگی رپورٹ جاری، پولیس نے 14 گینگز کو گرفتار کر کے 72 لاکھ سے زائد مال مسروقہ برآمد کر لیا۔
تفصیلات کے مطابق ڈسٹرکٹ پولیس آفیسر شفیق احمد چوہدری کی سربراہی میں جہلم پولیس نے ماہ مارچ کی کارکردگی رپورٹ جاری کر دی، جس کے مطابق جرائم کے خلاف مؤثر کارروائیوں کے دوران بھاری مقدار میں مال مسروقہ برآمد اور متعدد ملزمان کو گرفتار کیا گیا۔
ترجمان جہلم پولیس کے مطابق گزشتہ ماہ 14 گینگز کو ٹریس کر کے 53 مقدمات میں 37 ملزمان کو گرفتار کیا گیا جبکہ مجموعی طور پر 72 لاکھ 44 ہزار 200 روپے مالیت کا مال مسروقہ برآمد کیا گیا۔
کارروائیوں کے دوران 75 مجرمان اشتہاری گرفتار کیے گئے جن میں 19 اے کیٹگری، 38 بی کیٹگری جبکہ 18 عدالتی مفرور شامل ہیں۔ قتل کے 2 مقدمات میں 2 ملزمان اور ریپ کے 5 مقدمات میں 6 ملزمان کو گرفتار کیا گیا۔
ترجمان جہلم پولیس کے مطابق منشیات کے خلاف کارروائی میں 6 مقدمات درج کر کے 6 ملزمان کو گرفتار کیا گیا جن سے 529 گرام چرس اور 24 بوتلیں شراب برآمد ہوئیں۔ غیر قانونی اسلحہ کے 23 مقدمات میں 23 ملزمان کو گرفتار کر کے 25 پستول، ایک کلاشنکوف اور 107 گولیاں برآمد کی گئیں۔
قمار بازی کے خلاف کارروائی میں 2 مقدمات درج کر کے 9 ملزمان کو گرفتار کیا گیا، جن سے 6 موبائل فونز، 7 موٹر سائیکلیں اور 2 مرغے برآمد ہوئے۔ پتنگ بازی کے خلاف کریک ڈاؤن میں 3 ملزمان کو گرفتار کر کے 646 پتنگیں اور 11 خونی ڈوریں قبضے میں لی گئیں۔
ترجمان جہلم پولیس کے مطابق بھکاریوں کے خلاف کریک ڈاؤن کے دوران 79 مقدمات درج کر کے 114 افراد کو گرفتار کیا گیا جن میں 51 مرد اور 63 خواتین شامل ہیں۔
ٹریفک قوانین کی خلاف ورزی پر 6 ہزار 848 چالان کر کے ایک کروڑ 50 لاکھ 15 ہزار روپے جرمانہ عائد کیا گیا، جبکہ پولیس خدمت مراکز میں 4 ہزار 459 شہریوں کو مختلف سہولیات فراہم کی گئیں۔
ترجمان جہلم پولیس نے بتایا کہ شکایات سیل کے ذریعے 304 شہریوں کی شکایات سن کر ان پر فوری احکامات جاری کیے گئے، جبکہ جرائم کے خاتمے، عوام کے جان و مال کے تحفظ اور امن و امان کے قیام کے لیے کارروائیاں مسلسل جاری رہیں گی۔
