دینہ کے قریب جی ٹی روڈ پر ٹریفک کا خوفناک حادثہ ، تیز رفتار کار بے قابو ہو کر قلابازیاں کھاتے ہوئے مخالف سمت پر چنگ چی رکشہ کے اوپر جا گری، خاتون سمیت 4افرادشدید زخمی، کار اور چنگ چی رکشہ مکمل طور پر تباہ ہو گیا۔ اطلاع ملتے ہی پٹرولنگ پولیس موقع پر پہنچ گئی، زخمیوں کو ریسکیو 1122نے ہسپتال منتقل کیا ۔
تفصیلات کے مطابق دینہ کے قریب جی ٹی روڈ چک اکا کے مقام پر جہلم کی سمت سے آنے والی تیز رفتار کار نمبری AAA-389 اسلام آباد جو کہ دینہ کی طرف جا رہی تھی اچانک کار ڈرائیور محاد احمد ولد ادریس سکنہ جہلم سے بے قابو ہو کر قلابازیاں کھاتی ہوئی مخالف سمت روڈ پر دینہ کی طرف سے جہلم جانے والے چنگ چی رکشہ کے اوپر جا گری۔
حادثہ سے رکشہ میں سوار 2افراد محمد طاہر عمر 55سال اور محمد رشید عمر 60سال جو کہ شدید زخمی ہو گئے، اسی طرح کار میں بیٹھی خاتون اور ڈرائیور محاد بھی شدید زخمی ہو گیا۔
حادثہ اتنا شدید تھا کہ تیز رفتار کار قلابازیاں کھاتے ہوئے زور دار دھماکے کے ساتھ چنگ چی رکشہ پر جا گری ، مقامی لوگوں نے دھماکے کی آواز سن کر دوڑیں لگا دیں اور زخمیوں کو باہر نکالا۔
اطلاع ملتے ہی پٹرولنگ پولیس چک اکا دینہ موقع پر پہنچ گئی اور ریسکیو 1122نے زخمیوں کو ہسپتال منتقل کیا ، بتایا جاتا ہے کہ چنگ چی رکشہ میں سوار دونوں افراد شدید زخمی ہو گئے ہیں جبکہ حادثے کا شکار ہونے والی کار اور چنگ چی رکشہ کو بھی کافی نقصان پہنچا ۔
