جہلم: وزیر اعلیٰ پنجاب مریم نواز شریف کی خصوصی ہدایات پر ڈسٹرکٹ ہیڈکوارٹر اسپتال جہلم میں اسپیشل ایجوکیشن (معذور افراد) کیمپ کا انعقاد کیا گیا، جس میں خصوصی بچوں کو مفت طبی سہولیات فراہم کی گئیں۔
اس کیمپ کے دوران کل 30 معذور بچوں کا تفصیلی طبی معائنہ کیا گیا۔ اسپتال کے ماہر ڈاکٹروں نے بچوں کے علاج معالجے میں بھرپور دلچسپی لی اور تمام مقررہ پروٹوکولز پر مکمل عملدرآمد یقینی بنایا۔
اسپیشل ایجوکیشن ڈیپارٹمنٹ کے عملے اور کیمپ میں شامل اساتذہ نے میڈیکل سپرنٹنڈنٹ ڈی ایچ کیو اسپتال جہلم اور ان کی پوری ٹیم کا خصوصی شکریہ ادا کیا جنہوں نے اس قومی خدمت کو کامیابی سے مکمل کر کے ایک اہم قدم اٹھایا۔
کیمپ کی قیادت کرنے والے ایم ایس ڈاکٹر سہیل اعجاز نے کیمپ کے کامیاب انعقاد پر اسپتال کی انتظامیہ، کنسلٹنٹس، ڈاکٹروں، پیرا میڈیکل اسٹاف اور سپورٹو عملے کی انتھک محنت اور دن رات جاری خدمات کو سراہا۔
ایم ایس ڈاکٹر سہیل اعجاز نے کہا کہ یہ تمام خدمات وزیر اعلیٰ پنجاب مریم نواز شریف، سیکرٹری صحت نادیہ ثاقب، مشیر صحت پنجاب میجر جنرل (ر) ڈاکٹر اظہر کیانی، ڈپٹی کمشنر میثم عباس جہلم اور ڈی ایچ اے ہیلتھ ٹیم کی رہنمائی اور ہدایات کے تحت فراہم کی جا رہی ہیں تاکہ عوام کو بہترین ممکنہ طبی سہولیات ان کی دہلیز پر مہیا کی جا سکیں۔
انہوں نے مزید کہا کہ ہمارا مقصد عوام کو بہتر سے بہتر طبی خدمات مہیا کرنا ہے، تمام ادویات اسپتال سے ہی تجویز کی جاتی ہیں اور عملے کی حاضری کو باقاعدہ ڈیوٹی روسٹر کے تحت یقینی بنایا جاتا ہے۔
ان کا کہنا تھا کہ گزشتہ دو ماہ کے دوران اسپتال کی کارکردگی قابلِ اطمینان رہی ہے اور ہم اپنی کوششوں کو مزید تیز کرتے ہوئے عوامی توقعات پر پورا اترنے کے لیے کوشاں ہیں۔ انہوں نے شہریوں سے اپیل کی کہ وہ تعاون جاری رکھیں تاکہ اعلیٰ حکام کی ہدایات کے مطابق جہلم کے شہریوں کو معیاری اور بروقت علاج کی سہولیات مہیا کی جا سکیں۔
