جہلم شہر میں تجاوزات کی بھرمار، تجاوزات کی وجہ سے شہر میں ٹریفک جام رہنا معمول بن گیا، پیدل چلنے والوں کوبھی مشکلات کا سامنا، تجاوزات کی بدولت شہریوں کی زندگیاں مفلوج ہو کر رہ گئیں جبکہ بے ہنگم ٹر یفک نے رہی سہی کسر بھی نکال دی۔
تفصیلات کے مطابق شہر کے بازاروں سڑکوں کے اردگرد ریڑھی بانوں نے ریڑھیاں اور لوڈر رکشے کھڑے کرکے آمدورفت میں مشکلات پیدا کر رکھی ہیں شہر میں جگہ جگہ تجاوزات نے شہرکی کشادہ سڑکوں کو باریک گلیوں میں تبدیل کر دیا ہے، انتظامیہ اورمیونسپل کمیٹی کی عدم توجہی کیوجہ سے تجاوزات مافیا نے مستقل بنیادوں پر ٹھیے قائم کررکھے ہیں۔
انتہائی باوثوق ذرائع سے معلوم ہوا ہے کہ میونسپل کمیٹی کے شعبہ انکروچمنٹ کے عملے کی سرپرستی اور مقامی سیاست دانوں کی آشیر باد کیوجہ سے مافیا نے قبضے جما رکھے ہیں ، بااثر دکانداروں نے تجاوزات کی سرپرستی کرتے ہوئے عارضی ٹھیئے دکانوں کے باہر قائم کروا ر کھے ہیں جن سے باقاعدہ روزانہ کی بنیاد پر بھاری معاوضہ وصول کیا جاتا ہے ۔
شہری ، سماجی ، رفاعی ،فلاحی تنظیموں کے عمائدین نے نگران وزیراعلیٰ پنجاب، چیف سیکرٹری پنجاب، سیکرٹری بلدیات سے شہر سمیت ضلع بھر میں قائم تجاوزات ختم کروانے کا مطالبہ کیا ہے۔
