جہلم شہر سمیت مضافاتی علاقوں میں کڑاکے کی خشک سردی کا راج برقرار ، میدانی علاقوں میں فوگ شیٹ کے باعث کئی علاقے دھندلا گئے۔
رات کے وقت درجہ حرارت 5 سنٹی گریڈ تک گر گیا ، دھند سے جہاں معمولات زندگی شدید متاثر ہوئے وہاں د ھند کے باعث زیر کاشت گندم کی فصل کیلئے بھی خطرات کا باعث بن رہی ہے۔
محکمہ موسمیات کے مطابق شمالی علاقہ کے پہاڑوں پر برفباری اور دھند کی وجہ سے سورج نہ نکلنے کے سبب درجہ حرارت میں کمی اور شدید سردی کی لہر جاری ہے۔
موسم کے سرد اور خشک ہونے کی وجہ سے ضلع بھر کے سرکاری ونجی ہسپتالوں کلینکس میں نزلہ زکام، بخار، کھانسی اور سانس لینے میں دشواری کے مریضوں کی تعداد میں اضافہ ہو گیا ہے۔
ڈسٹرکٹ ہیڈ کوارٹر ہسپتال کے ڈاکٹر زنے ہدایت کی ہے کہ خشک سردی کی بنا پر بچوں بوڑھوں و دیگر افراد کو سردی لگنے سے بچائیںاور گرم مشروبات سمیت گرم ملبوسات کا استعمال کریں تاکہ بیماریوں سے بچا جا سکے ۔
