جہلم: یوٹیلیٹی سٹورز پر اشیاء خوردونوش عام مارکیٹ سے مہنگی فروخت کی جانے لگیں۔
دستاویزات کے مطابق یوٹیلیٹی اسٹورز پر آٹا ، ٹوٹا چاول ،باسمتی چاول، دال چنا، چینی ، سفید چنے عام مارکیٹ سے مہنگے، باسمتی چاول اور سیلا چاول بھی عام مارکیٹ سے مہنگے فروخت کئے جارہے ہیں، سیلا چاول بازار سے 55 روپے 45 پیسے مہنگے فروخت ہو رہے ہیں۔
عام مارکیٹ میں سیلا چاول 314 روپے 55 پیسے اور یوٹیلیٹی سٹورز پر 370 روپے فی کلو کے حساب سے فروخت کئے جارہے ہیں، یوٹیلیٹی سٹورز پر 20 کلو آٹے کا تھیلا مارکیٹ سے 24 روپے 67 پیسے مہنگا، عام مارکیٹ میں 2815 روپے 33 پیسے میں دستیاب آٹا یوٹیلیٹی سٹورز پر 2840 روپے کا فروخت کیا جارہاہے۔
سفید چنے یوٹیلیٹی سٹورز پر عام مارکیٹ سے 17 روپے 31 پیسے مہنگے، عام مارکیٹ میں 388 روپے فی کلو کے حساب سے دستیاب ہیں جبکہ سفید چنے یوٹیلیٹی سٹورز پر 405 روپے فی کلو فروخت ہو رہے ہیں۔
یوٹیلیٹی سٹورز پر چینی عام مارکیٹ سے 13 روپے 23 پیسے مہنگی مل رہی ہے ، سپر باسمتی چاول بھی یوٹیلیٹی سٹورز پر عام مارکیٹ سے 8 روپے 38 پیسے مہنگے اور دال چنا عام مارکیٹ سے 11 روپے 68 پیسے مہنگی فروخت ہورہی ہے، ٹوٹا باسمتی چاول فی کلو یوٹیلیٹی سٹورز پر عام مارکیٹ سے 9 روپے57 پیسے مہنگے فروخت کیے جارہے ہیں۔
شہریوں نے وفاقی حکومت سے مطالبہ کیاہے کہ یوٹیلیٹی سٹورز پر مارکیٹ کی نسبت قیمتوں میں غیر معمولی کمی کی جائے تاکہ غریب ، سفید پوش طبقہ حکومتی ریلیف سے مستفید ہو سکے۔
