جہلم: ڈی پی او جہلم شفیق احمد چوہدری نے کہا ہے کہ شہریوں کے مسائل کے حل، بروقت انصاف کی فراہمی اور عوام دوست پولیسنگ کے لیے تمام ممکنہ اقدامات جاری رکھے جائیں گے، جبکہ شہریوں کے ساتھ براہِ راست رابطہ اور ان کی شکایات کا فوری ازالہ پولیس کی ترجیحات میں شامل ہے۔
وزیراعلیٰ پنجاب کے ویژن اور آئی جی پنجاب کی اوپن ڈور پالیسی کے مطابق ڈی پی او جہلم شفیق احمد چوہدری کی جانب سے ڈی پی او آفس جہلم میں روزانہ کی بنیاد پر کھلی کچہری کا انعقاد کیا جا رہا ہے۔ کھلی کچہری میں شہریوں کی بڑی تعداد نے شرکت کی اور اپنے مسائل، شکایات اور درخواستیں براہِ راست ڈی پی او جہلم کے سامنے پیش کیں۔
ڈی پی او جہلم شفیق احمد چوہدری نے شہریوں کے مسائل اور شکایات خود سنیں اور موقع پر ہی متعلقہ افسران کو ان کے حل اور ضروری کارروائی کے لیے احکامات جاری کیے۔ انہوں نے افسران کو ہدایت کی کہ شہریوں کی جانب سے پیش کی جانے والی شکایات کو میرٹ پر اور ترجیحی بنیادوں پر حل کیا جائے اور اس سلسلے میں کسی قسم کی غفلت یا تاخیر ہرگز برداشت نہیں کی جائے گی۔
ڈی پی او جہلم نے متعلقہ افسران کو مزید ہدایت کی کہ شہریوں کے مسائل کے حل کو یقینی بناتے ہوئے مقررہ وقت کے اندر عملدرآمد رپورٹ پیش کی جائے۔ انہوں نے واضح کیا کہ پولیس افسران شہریوں کے ساتھ خوش اخلاقی سے پیش آئیں اور ان کی شکایات کے ازالے کے لیے قانون اور میرٹ کے مطابق فوری اقدامات کیے جائیں۔
ڈی پی او جہلم نے کہا کہ کھلی کچہری کے انعقاد کا بنیادی مقصد شہریوں کو فوری انصاف کی فراہمی اور ان کے مسائل کا بروقت حل یقینی بنانا ہے۔ پولیس عوام کی خدمت کے لیے ہمہ وقت کوشاں ہے اور شہریوں کے ساتھ براہِ راست رابطے کے ذریعے ان کی مشکلات کو سمجھنے اور شکایات کے فوری ازالے پر خصوصی توجہ دی جا رہی ہے۔
انہوں نے مزید کہا کہ شہریوں کے مسائل کے حل، بروقت انصاف کی فراہمی اور عوام دوست پولیسنگ کے لیے تمام ممکنہ اقدامات جاری رکھے جائیں گے۔
