پنڈدادنخان: رکن قومی اسمبلی چوہدری فرخ الطاف نے کہا ہے کہ وزیراعظم فیول سبسڈی پروگرام کے تحت شہریوں کو فراہم کیے جانے والے ریلیف کی شفاف اور موثر انداز میں فراہمی یقینی بنانا ضروری ہے تاکہ مستحق شہری مقررہ طریقہ کار کے مطابق اس سہولت سے بروقت استفادہ کر سکیں۔
انہوں نے ان خیالات کا اظہار اسسٹنٹ کمشنر پنڈدادنخان عائشہ شفقت کے ہمراہ مختلف پٹرول پمپس کے دورے کے موقع پر کیا۔ چوہدری فرخ الطاف نے وزیراعظم فیول سبسڈی پروگرام کے تحت شہریوں کو فراہم کیے جانے والے ریلیف، رجسٹریشن اور ٹوکن کے اجرا کے عمل کا موقع پر جائزہ لیا۔ اس دوران پروگرام پر عملدرآمد، رجسٹریشن کے انتظامات اور شہریوں کو فیول ریلیف کی فراہمی سے متعلق مختلف امور کا تفصیلی معائنہ کیا گیا۔
دورے کے دوران متعلقہ عملے نے رکن قومی اسمبلی چوہدری فرخ الطاف اور اسسٹنٹ کمشنر عائشہ شفقت کو رجسٹریشن کے عمل سے متعلق بریفنگ دی اور شہریوں کی پروگرام کے لیے رجسٹریشن، کامیاب اندراج کے بعد ٹوکن کے حصول اور سبسڈی کے تحت پٹرول حاصل کرنے کے طریقہ کار کا عملی مظاہرہ بھی کیا۔
اس موقع پر رجسٹرڈ شہریوں کے ٹوکن کی تصدیق اور سبسڈی کے تحت پٹرول کی فراہمی کا مکمل عمل بھی عملی طور پر چیک کیا گیا۔ چوہدری فرخ الطاف نے متعلقہ عملے سے پروگرام پر عملدرآمد کے حوالے سے معلومات حاصل کیں اور شہریوں کو فراہم کی جانے والی سہولت کا جائزہ لیا۔
چوہدری فرخ الطاف نے کہا کہ وزیراعظم فیول سبسڈی پروگرام کا بنیادی مقصد شہریوں کو فیول کے بڑھتے ہوئے اخراجات میں ریلیف فراہم کرنا ہے، اس لیے اس پروگرام پر شفاف اور مؤثر انداز میں عملدرآمد ہر صورت یقینی بنایا جائے۔ انہوں نے کہا کہ رجسٹریشن کے عمل میں شہریوں کو مکمل رہنمائی فراہم کی جائے اور ٹوکن کے اجرا سے لے کر سبسڈی کے تحت پٹرول کی فراہمی تک تمام مراحل مقررہ طریقہ کار کے مطابق مکمل کیے جائیں۔
انہوں نے مزید کہا کہ شہریوں کو بروقت معلومات اور رہنمائی فراہم کرنا بھی ضروری ہے تاکہ انہیں رجسٹریشن یا فیول ریلیف کے حصول میں کسی غیر ضروری دشواری کا سامنا نہ کرنا پڑے۔ متعلقہ عملہ شہریوں کی سہولت اور رہنمائی کے لیے مؤثر کردار ادا کرے اور فیول سبسڈی کی فراہمی میں شفافیت کو بنیادی اہمیت دی جائے۔
اس موقع پر اسسٹنٹ کمشنر پنڈدادنخان عائشہ شفقت نے بھی پروگرام پر عملدرآمد اور شہریوں کو ریلیف کی فراہمی سے متعلق انتظامات کا جائزہ لیا۔ متعلقہ حکام کو ہدایت کی گئی کہ وزیراعظم فیول سبسڈی پروگرام کے تحت شہریوں کو مقررہ طریقہ کار کے مطابق ریلیف کی بلاتعطل فراہمی یقینی بنائی جائے۔
