جہلم: چوہدری محمد عارف اور طارق دول نے کہا کہ بھاری ٹیکسز، مہنگے یوٹیلیٹی بلز اور کاروباری ماحول میں عدم استحکام کے باعث چھوٹا تاجر شدید مشکلات کا شکار ہے۔ چھوٹے تاجر ملکی معیشت میں ریڑھ کی ہڈی کا کردار ادا کر رہے ہیں، مگر اس کے باوجود انہیں مسلسل نظر انداز کیا جا رہا ہے۔
مرکزی انجمن تاجران جہلم کے صدر چوہدری محمد عارف اور صدر صرافہ ایسوسی ایشن طارق دول نے اپنے مشترکہ بیان میں کہا کہ حکومت کو چاہیے کہ چھوٹے تاجروں کے لیے آسان اور قابلِ فہم ٹیکس نظام متعارف کرائے، بجلی و گیس کے نرخ کم کیے جائیں اور کاروبار دوست پالیسیاں بنائی جائیں، تاکہ تاجر سکھ کا سانس لے سکیں۔
ان کا کہنا تھا کہ چھوٹے تاجر بھی ملکی معیشت کے اہم اسٹیک ہولڈر ہیں، تاہم ان کے مسائل کو ترجیحی بنیادوں پر حل نہیں کیا جا رہا۔ انہوں نے شکوہ کیا کہ مختلف سرکاری محکمے حیلے بہانوں سے خوف و ہراس پیدا کر کے تاجروں کو ہراساں کرتے ہیں، جس کے باعث تاجر برادری میں شدید احساسِ محرومی پایا جاتا ہے۔
چوہدری محمد عارف اور طارق دول نے وزیرِ اعلیٰ پنجاب مریم نواز شریف سے مطالبہ کیا کہ چھوٹے تاجروں کے لیے بلا سود قرضہ اسکیم متعارف کرائی جائے، کیونکہ اس سے آنے والا سرمایہ براہِ راست مارکیٹ میں گردش کرے گا اور کاروباری سرگرمیوں میں اضافہ ہوگا۔
