دینہ میں ایریا منیجر گوہر پبلشرز جہلم افتخار علی کے زیر اہتمام پرنسپلز کنونشن کا انعقاد کیا گیا۔
تفصیلات کے مطابق گوہر پبلشرز کی جانب سے ملک بھر میں پرنسپل کنونشنز کے انعقاد کا سلسلہ کامیابی کے ساتھ جاری ہے۔ اسی سلسلے میں جہلم کی تحصیل دینہ کی ایک نجی مارکی میں ایریا منیجر گوہر پبلشرز جہلم افتخار علی کے زیر اہتمام ایک شاندار پرنسپل کنونشن منعقد کیا گیا، جس میں مختلف تعلیمی اداروں کی پرنسپلز نے کثیر تعداد میں شرکت کی۔
کنونشن میں گوہر پبلشرز کے ڈیلر سجاد احمد (چوہدری کتاب گھر دینہ) بھی موجود تھے۔ اسلام آباد سے تشریف لائے معروف ماہر ٹرینر مدثر حبیب نے کنونشن کے شرکاء کو جدید تعلیمی تقاضوں، نصابی منصوبہ بندی اور تدریسی نظام کو بہتر بنانے سے متعلق مفید اور جامع تربیت فراہم کی۔ ٹریننگ سیشن کے دوران تعلیمی معیار میں بہتری، طلبہ کی کردار سازی، اور اساتذہ و انتظامیہ کے باہمی تعاون کی اہمیت پر تفصیلی گفتگو کی گئی۔
کنونشن میں شریک پرنسپلز نے اس طرح کی پیشہ ورانہ تربیتی سرگرمیوں کو وقت کی اہم ضرورت قرار دیتے ہوئے گوہر پبلشرز کی تعلیمی خدمات کو سراہا اور انہیں قابلِ تحسین قرار دیا۔ شرکاء کا کہنا تھا کہ ایسے تربیتی سیشنز تعلیمی اداروں میں مثبت تبدیلی اور تدریسی معیار کو بلند کرنے میں اہم کردار ادا کرتے ہیں۔
آخر میں ایریا منیجر گوہر پبلشرز جہلم افتخار علی نے چوہدری سجاد احمد کے ہمراہ میڈیا سے خصوصی گفتگو کی اور کنونشن کے مقاصد و نتائج پر روشنی ڈالی۔ اس موقع پر احسن محمود چوہدری (بڑا گواہ)، نبیل احمد (پدھری)، فیصل محمود (کوہالی)، ابرار نجیب (جھنگ چک) اور چوہدری عامر (نگیال) نے بھی خصوصی شرکت کی۔
