پڑی درویزہ/ سوہاوہ: "کفر ٹوٹا خدا خدا کر کے”، تین مرلہ مفت پلاٹ سکیم کی آن لائن رجسٹریشن کا آغاز ہو گیا۔
تفصیلات کے مطابق عوام کے طویل انتظار کا خاتمہ ہو گیا، پنجاب حکومت کی جانب سے تین مرلہ مفت پلاٹ سکیم کی آن لائن رجسٹریشن کا باقاعدہ آغاز کر دیا گیا ہے۔ وزیر اعلیٰ پنجاب مریم نواز شریف کی جانب سے رواں سال رمضان المبارک (مارچ 2025) میں اعلان کردہ "اپنی چھت اپنا گھر” پروگرام کے تحت "اپنی زمین اپنا گھر” کے عنوان سے اب باقاعدہ رجسٹریشن شروع ہو چکی ہے۔
اس سکیم کا مقصد صوبہ بھر میں ان افراد کو مفت رہائشی زمین مہیا کرنا ہے جو خود اراضی کے مالک نہیں۔ ابتدائی مرحلے میں پنجاب کے 19 اضلاع کو شامل کیا گیا ہے، جن میں جہلم، اٹک، منڈی بہاؤالدین، سرگودھا، راجن پور، وہاڑی، گجرات، جھنگ، اوکاڑہ، لیہ، لودھراں، چنیوٹ، فیصل آباد، خوشاب، قصور، ساہیوال، بھکر، بہاولنگر اور بہاولپور شامل ہیں۔
درخواست دہندگان "اپنی زمین اپنا گھر” سکیم کے لیے قریبی انٹرنیٹ فائل آپریٹر یا سروس سنٹر کے ذریعے آن لائن درخواست جمع کرا سکتے ہیں۔ سوشل میڈیا اور دیگر ڈیجیٹل پلیٹ فارمز پر رجسٹریشن کا باقاعدہ اعلان کیے جانے کے بعد بڑی تعداد میں شہری اس سکیم میں دلچسپی لے رہے ہیں۔
عوامی و سماجی حلقوں نے سکیم کے آغاز پر خوشی کا اظہار کرتے ہوئے اُمید ظاہر کی ہے کہ اس منصوبے سے بے زمین اور کم آمدنی والے طبقات کو فائدہ پہنچے گا، اور وہ اپنے ذاتی گھر کی جانب پہلا قدم اٹھا سکیں گے۔
