جہلم: مرکزی علماء کونسل پاکستان ضلع جہلم نے سعودی عرب کے شاہ خالد انٹرنیشنل ایئرپورٹ اور دیگر شہری تنصیبات پر حوثی باغیوں کے حالیہ میزائل اور ڈرون حملوں کی شدید مذمت کرتے ہوئے انہیں خطے کے امن و سلامتی کے لیے سنگین خطرہ قرار دیا ہے۔ علماء کرام نے ان حملوں کو بین الاقوامی قوانین کی خلاف ورزی قرار دیتے ہوئے عالمی برادری سے مطالبہ کیا ہے کہ وہ صورتِ حال کا فوری نوٹس لے اور خطے میں امن و استحکام کے قیام کے لیے اپنا مؤثر کردار ادا کرے۔
مرکزی علماء کونسل پاکستان ضلع جہلم کے صدر حکیم قاری شبیر احمد عثمانی نے اپنے بیان میں کہا کہ سعودی عرب کی سرزمین پر حوثیوں کے میزائل حملے انتہائی قابلِ مذمت ہیں۔ ایسے حملے نہ صرف علاقائی امن کے لیے خطرہ ہیں بلکہ شہری تنصیبات کو نشانہ بنانا بین الاقوامی قوانین کی کھلی خلاف ورزی بھی ہے۔ انہوں نے کہا کہ عالمی برادری کو چاہیے کہ وہ ان حملوں کی روک تھام اور خطے میں امن و سلامتی کے تحفظ کے لیے فوری اقدامات کرے۔
حکیم قاری شبیر احمد عثمانی نے کہا کہ مرکزی علماء کونسل پاکستان سعودی عرب کی سلامتی اور تحفظ کے لیے اپنی غیر متزلزل حمایت کا اعلان کرتی ہے۔ انہوں نے زور دیا کہ حرمین شریفین کے تقدس اور سلامتی کا ہر صورت احترام کیا جانا چاہیے اور ایسے تمام اقدامات کی حوصلہ شکنی ضروری ہے جو مقدس مقامات اور خطے کے امن کے لیے خطرات پیدا کریں۔
مرکزی علماء کونسل ضلع جہلم کے قائدین اور علماء کرام نے بھی حوثی باغیوں کے حملوں کی مذمت کرتے ہوئے مطالبہ کیا کہ ایسے غیر ذمہ دارانہ اقدامات کا فوری خاتمہ کیا جائے جو علاقائی امن و سلامتی کے لیے سنگین خطرہ بن سکتے ہیں۔ انہوں نے حملوں میں جاں بحق ہونے والے افراد کے لیے دعائے مغفرت اور زخمیوں کی جلد صحت یابی کے لیے دعا بھی کی۔
دوسری جانب ملک میں بڑھتی ہوئی دہشت گردی کے خلاف خیبر پختونخوا میں وفاقی حکومت کی جانب سے کیے جانے والے اقدامات کا خیرمقدم کرتے ہوئے علماء کرام نے کہا کہ ملکی سلامتی، امن اور استحکام کے لیے حکومت اور متعلقہ قومی اداروں کے ساتھ کھڑے ہیں۔ انہوں نے اس عزم کا اظہار کیا کہ ملک سے دہشت گردی کے خاتمے اور امن و امان کی صورتِ حال بہتر بنانے کے لیے مؤثر اقدامات کی حمایت جاری رکھی جائے گی۔
