جہلم: دہشت گردی، جرائم پیشہ عناصر کی سرکوبی اور اہم تنصیبات کی فول پروف سیکیورٹی کو یقینی بنانے کے لیے جہلم پولیس نے ضلع بھر میں خصوصی سرچ آپریشنز کیے، جن کے دوران تین اشتہاری مجرمان اور ایک عدالتی مفرور کو گرفتار کر لیا گیا۔
ترجمان جہلم پولیس کے مطابق ضلع کے مختلف علاقوں میں 15 مقامات پر سرچ آپریشنز کیے گئے، جن کے دوران 361 افراد، 149 گھروں اور 9 ہوٹلوں و بس اسٹینڈز کی چیکنگ عمل میں لائی گئی۔
پولیس کے مطابق سرچ آپریشن کے دوران تھانہ سول لائن کے علاقے سے ایک اشتہاری مجرم، تھانہ صدر کے علاقے سے دو اشتہاری مجرمان جبکہ تھانہ چوٹالہ کی حدود سے ایک عدالتی مفرور کو گرفتار کر کے قانونی کارروائی کا آغاز کر دیا گیا۔
ترجمان نے بتایا کہ یہ سرچ آپریشنز دہشت گردوں، جرائم پیشہ عناصر اور قانون شکن افراد کے خلاف مؤثر کارروائیوں کے سلسلے کی کڑی ہیں، جن کا مقصد امن و امان کا قیام، اہم تنصیبات کی سیکیورٹی کو مزید مضبوط بنانا اور شہریوں کے جان و مال کا تحفظ یقینی بنانا ہے۔
ڈی پی او جہلم شفیق احمد چوہدری نے شہریوں سے اپیل کی ہے کہ وہ اپنے اردگرد کے ماحول پر گہری نظر رکھیں اور کسی بھی مشکوک شخص، غیر قانونی طور پر مقیم افراد یا جرائم پیشہ سرگرمیوں میں ملوث عناصر کے بارے میں فوری طور پر قریبی تھانے یا پولیس ہیلپ لائن 15 پر اطلاع دیں۔
انہوں نے کہا کہ بروقت اطلاع کسی بڑے جرم کی روک تھام اور معاشرے میں امن و امان کے قیام میں اہم کردار ادا کر سکتی ہے، جبکہ پولیس عوام کے تعاون سے جرائم کے خاتمے اور محفوظ معاشرے کے قیام کے لیے اپنی کارروائیاں بلاامتیاز جاری رکھے گی۔
