جہلم میں دفعہ 144 کی خلاف ورزی کرنے اور شدید بارش میں پانی کے تیز بہاؤ میں جانے والے 6 افراد کو پولیس نے گرفتار کر لیا۔
تفصیلات کے مطابق شدید بارشوں کے دوران شہریوں کی جان و مال کے تحفظ کے لیے ضلعی انتظامیہ کی جانب سے نافذ دفعہ 144 کی خلاف ورزی کرنے اور پانی کے تیز بہاؤ والے مقامات پر جانے والے 6 افراد کو جہلم پولیس نے گرفتار کر لیا۔
ترجمان جہلم پولیس کے مطابق ایس ایچ او تھانہ چوٹالہ اور ٹیم نے کارروائی کرتے ہوئے 6 افراد کو گرفتار کیا۔ پولیس کے مطابق ملزمان شدید بارش کے دوران پانی کے تیز بہاؤ میں گئے، جس پر ان کے خلاف دفعہ 144 کی خلاف ورزی کا مقدمہ درج کرکے مزید قانونی کارروائی شروع کر دی گئی ہے۔
پولیس نے شہریوں کو ہدایت کی ہے کہ شدید بارش کے دوران ندی نالوں، برساتی نالوں اور پانی کے تیز بہاؤ والے مقامات پر جانے سے گریز کریں، کیونکہ ایسے مقامات پر کسی بھی وقت جانی حادثہ پیش آ سکتا ہے۔
جہلم پولیس کا کہنا ہے کہ دفعہ 144 کی خلاف ورزی کرنے والوں کے خلاف بلاامتیاز قانونی کارروائی جاری رکھی جائے گی، جبکہ شہری اپنی اور اپنے پیاروں کی حفاظت کو یقینی بناتے ہوئے ضلعی انتظامیہ اور پولیس کی جانب سے جاری کردہ حفاظتی ہدایات پر عمل کریں۔
