پنڈدادنخان میں ڈاکوؤں کی عیدی مہم، نامعلوم موٹر سائیکل سوارڈاکوعید سے ایک روز قبل محنت کش ٹیلر ماسٹر کو لوٹ لیا۔ ڈاکو تشدد کے بعد ہزاروں روپے چھین کر فرار، علاقے میں خوف و ہراس پھیل گیا۔
تفصیلات کے مطابق جہلم کی تحصیل پنڈدادنخان میں تھانہ جلالپور شریف کے علاقے پننوال میں عید سے ایک روز قبل ڈکیتی کی واردات پیش آئی جہاں نامعلوم موٹر سائیکل سوار ڈاکوؤں نے ایک محنت کش ٹیلر ماسٹر کو لوٹ لیا، واقعے کے بعد علاقے میں خوف و ہراس پھیل گیا۔
گزشتہ رات موٹر سائیکل سوار ڈاکوؤں نے پننوال کے رہائشی ٹیلر ماسٹر اسد کو راستے میں روک کر تشدد کا نشانہ بنایا اور اس سے پچاس ہزار روپے نقدی چھین کر فرار ہو گئے۔ متاثرہ شخص کا کہنا ہے کہ یہ رقم اس کی محنت کی کمائی تھی جو اس نے عید کے اخراجات کے لیے جمع کی تھی۔
علاقہ مکینوں نے بڑھتی ہوئی وارداتوں پر تشویش کا اظہار کرتے ہوئے پولیس سے مطالبہ کیا ہے کہ پننوال اور گردونواح میں گشت بڑھایا جائے اور شہریوں کو تحفظ فراہم کیا جائے۔
متاثرہ ٹیلر ماسٹر نے بھی حکام سے اپیل کی ہے کہ واقعے کا فوری نوٹس لے کر ملزمان کو گرفتار کیا جائے اور اس کی رقم واپس دلائی جائے تاکہ اسے انصاف مل سکے۔
