جہلم شہر سمیت گردونواح میں قائم ہوٹلز مالکان نے روٹی اور نان کی قیمتوں میں خود ساختہ اضافہ کر کے وزیراعلیٰ پنجاب مریم نواز شریف کے احکامات ہوا میں اڑا دیئے ، انتظامیہ تندور مالکان اور نان بائیوں کے خلاف کارروائیاں کرنے میں مگن، بڑے مگرمچھوں کی موجیں لگ گئیں۔
تفصیلات کے مطابق اندرون شہر اور جی ٹی روڈ پر قائم تمام ہوٹلز مالکان نے 15 روپے روٹی فروخت کرنے کے احکامات کو ہوا میں اڑاتے ہوئے چور راستہ تلاش کرلیا ہے۔
بڑے ہوٹلز مالکان نے کمال مہارت سے 15 روپے فی روٹی فروخت کرنے کی بجائے فی کس 90 روپے وصولی شروع کرلی ہے جس کا مطلب ہے کہ 1 گاہک 6 روٹیاں استعمال کرتا ہے جس کیوجہ سے گاہکوں اور ہوٹلز مالکان کے مابین توں تکرار گالی گلوچ اور لڑائی جھگڑے روزانہ کا معمول بن چکے ہیں۔
شہریوں نے وزیراعلیٰ پنجاب مریم نواز شریف اور چیف سیکرٹری پنجاب سے مطالبہ کیاہے کہ چھوٹے بڑے ہوٹلوں پر روٹی کا نرخ 15 روپے مقرر کروایا جائے تاکہ بڑے ہوٹلز مالکان پر بھی سرکاری حکم لاگو ہو سکے اور ریاست کے اندر قائم ہونے والی ریاست کا خاتمہ ممکن ہو سکے۔
