جہلم: معروف مذہبی اسکالر اور یوٹیوبر انجینئر محمد علی مرزا کی اکیڈمی پر فائرنگ سے حملہ آور ہلاک جبکہ پولیس کانسٹیبل زخمی ہو گیا۔
ذرائع کے مطابق جہلم میں معروف مذہبی اسکالر اور یوٹیوبر انجینئر محمد علی مرزا کی قرآن و سنت ریسرچ اکیڈمی کے باہر فائرنگ کا واقعہ پیش آیا، جس میں پولیس کی بروقت کارروائی سے حملہ ناکام بنا دیا گیا، حملہ آور ہلاک جبکہ ایک پولیس اہلکار زخمی ہو گیا۔
ذرائع کے مطابق واقعہ اتوار کی صبح تقریباً 10:45 بجے جی ٹی ایس چوک کے قریب پیش آیا، جہاں مسلح حملہ آور نے اکیڈمی کے مرکزی گیٹ اور ڈیوٹی پر موجود پولیس اہلکاروں پر اندھا دھند فائرنگ کی۔ حملہ آور سڑک کے دوسری جانب گرین بیلٹ پر لیٹ کر فائرنگ کر رہا تھا۔
پولیس نے فوری اور مؤثر جوابی کارروائی کرتے ہوئے حملہ آور کو ہلاک کر دیا جبکہ فائرنگ کے دوران کانسٹیبل احسن پنڈلی پر گولی لگنے سے زخمی ہو گیا، جسے فوری طور پر ہسپتال منتقل کر دیا گیا۔
واقعے کے وقت اکیڈمی کے اندر انجینئر محمد علی مرزا معمول کے مطابق درس دے رہے تھے، تاہم خوش قسمتی سے تمام شرکاء محفوظ رہے اور کوئی جانی نقصان نہیں ہوا۔
واقعہ کا نوٹس لیتے ہوئے آر پی او راولپنڈی سید خالد محمود ہمدانی نے فوری رپورٹ طلب کر لی ہے اور ذمہ داروں کے تعین کی ہدایت جاری کر دی ہے۔ پولیس نے علاقے کو گھیرے میں لے کر شواہد اکٹھے کرنا شروع کر دیے ہیں جبکہ مزید تحقیقات جاری ہیں۔
پولیس حکام کے مطابق سکیورٹی کو ہائی الرٹ کر دیا گیا ہے اور حساس مقامات پر نفری بڑھا دی گئی ہے، جبکہ قانون نافذ کرنے والے اداروں کے بروقت ردعمل سے ایک بڑے سانحے کو ٹال دیا گیا ہے۔
