جہلم شہر میں ٹریفک قوانین کی خلاف ورزیاں عروج پر پہنچ گئیں، ضلع بھر میں کم عمر ڈرائیورزٹریفک قوانین کی خلاف ورزیاں کرنے لگے ، ٹریفک پولیس اہلکاران قانون کی بالادستی قائم کرنے میں بری طرح ناکام،، چوک ، چوراہوں میں ٹریفک بحالی کے بجائے گپ شپ اور موبائل فون استعمال کرنے میں مصروف دکھا ئی دیتے ہیں۔
ٹریفک وارڈنز شہر سمیت ضلع بھر میں ٹریفک کنٹرول کرنے میں بری طرح ناکام ہو چکے ہیں، ہر شہری کو منزلِ مقصود پہنچنے میں جلدی ہوتی ہے اور ٹریفک وارڈنز کی موجودگی میں قوانین کی خلاف ورزیاں کی جا تی ہیں۔ شہر میں رانگ وے ، پارکنگ کے بغیر گاڑیاں کھڑی کرنا اور کم عمر ڈرائیور ز کی بھرمار سے شہری اذیت کا شکار ہو رہے ہیں۔
شہریوں نے الزام عائد کیا ہے کہ ٹریفک پولیس تجاوزات مافیا اور غیر قانونی پارکنگ اسٹیڈز مافیا سے مل چکی ہے ،ٹریفک پولیس کے اہلکار سڑکوں پر کھڑی کی جانے والی موٹر سائیکلیں اور گاڑیاں پارک کرنے سے روکنے میں ناکام دکھائی دیتے ہیں جس کی وجہ سے سڑکوں پر سفر کرنے والے افراد کو سخت مشکلات کا سامنا کرنا پڑتا ہے۔ دوسری جانب تجاوزات قائم کرنے والوں کو ٹریفک پولیس و انتظامیہ نے کھلی چھٹی دیدی ہے۔
شہریوں نے ٹریفک پولیس کی ناقص کارکردگی پر تشویش کا اظہار کرتے ہوئے نگران وزیراعلیٰ پنجاب، آئی جی پنجاب، ایڈیشنل ڈی آئی جی ٹریفک پولیس سے نوٹس لینے کا مطالبہ کیا ہے۔
