دینہ کے نواحی علاقے نکودر میں امیر المومنین حضرت علی المرتضیٰؑ کے یومِ ولادت کے سلسلے میں ایک پروقار تقریب کا انعقاد کیا گیا۔ تقریب کا اہتمام معروف شخصیت ایم اسلم انجم نے کیا، جس میں مختلف شعبہ ہائے زندگی سے تعلق رکھنے والی نمایاں شخصیات، مقامی علماء اور مشائخ نے شرکت کی۔
تقریب کے مہمانِ خصوصی آغا سید لال بادشاہ جی سرکار (امام بارگاہ اسد آباد) تھے۔ تقریب کا آغاز تلاوتِ قرآن پاک سے ہوا، جس کے بعد نعتِ رسول مقبول ﷺ اور منقبتِ مولا علی علیہ السلام کی روح پرور محفل منعقد کی گئی۔
مقررین نے مولا علی علیہ السلام کی حیاتِ طیبہ کے مختلف پہلوؤں پر روشنی ڈالی، ان کی بہادری، علم و حکمت، اور عدل و انصاف کے حوالے سے تفصیلی گفتگو کی۔
تقریب کے اختتام پر دو سو پاؤنڈ وزنی کیک کاٹا گیا اور شرکاء میں مٹھائی اور وسیع لنگر تقسیم کیا گیا۔ اس موقع پر خصوصی دعا علامہ رضوان حیدر شیرازی نے فرمائی، جس میں امتِ مسلمہ کی سلامتی، بھائی چارے کے فروغ، اور ملکی ترقی کے لیے دعائیں کی گئیں۔
تقریب میں حسینی سنگت کے ممبران، جن میں چوہدری احسن نمبردار، عرفان محبوب، محمد رزاق، راجہ صفدر، حسن رضا، شیخ اسد، طالب حسین، چوہدری وقار احسن، اور چوہدری خیام احسن شامل تھے، نے اہم کردار ادا کیا۔
تقریب میں معروف سیاسی شخصیات، چوہدری شہزاد احمد کنڈ، چوہدری محمد افضل، اور رضوان سیٹھی نے بھی خصوصی طور پر شرکت کی۔ شرکاء نے آغا سید لال بادشاہ جی سرکار کی قیادت میں امن و محبت کے پیغام کو عام کرنے کے عزم کا اظہار کیا اور تقریب کو ایک یادگار موقع قرار دیا۔
