جہلم پولیس کے الیکشن 2024 کے حوالے سے سکیورٹی انتظامات مکمل، پلان جاری

جہلم: ڈی پی او ناصر محمود باجوہ کے احکامات پر جہلم پولیس کے جنرل الیکشن 2024 کے حوالے سے سکیورٹی انتظامات مکمل، سکیورٹی پلان جاری کر دیا گیا۔

ترجمان جہلم پولیس کے مطابق الیکشن 2024ء کے سلسلہ میں تمام تر سکیورٹی انتظامات کو حتمی شکل دے دی گئی ہے، ضلع بھر میں 766پولنگ اسٹیشنز پر تین ہزار سے زائد پولیس افسران سمیت دیگر اداروں کے اہلکار الیکشن ڈیوٹی کے فرائض سر انجام دیں گے۔

ترجمان جہلم پولیس نے بتایا کہ ان میں 36 اے کیٹیگری، 172 بی کیٹیگری جبکہ 558 سی کیٹیگری کے پولنگ اسٹیشن شامل ہیں۔ کیٹیگری وائز تمام پولنگ اسٹیشن پر سکیورٹی کو یقینی بنایا جا رہا ہے۔

انہوں نے بتایا کہ کسی بھی ایمرجنسی صورتحال سے نمٹنے کے لیے پاکستان آرمی اور رینجرز کے دستے بھی موجود ہوں گے،تمام حلقہ بندیوں کو سیکیورٹی ڈیوٹی کی مناسبت سے سیکٹر وائز اور سب سیکٹر وائز تقسیم کیا گیا ہے۔

اس حوالے سے ڈی پی او جہلم ناصر محمود باجوہ کا کہنا تھا کہ ضابطہ اخلاق کی خلاف ورزی کسی صورت برداشت نہیں کی جائے گی۔ فائرنگ، ہلڑ بازی کسی صورت بھی برداشت نہیں کی جائے گی،قانون کی بالادستی کو قائم رکھا جائے گا، قانون شکن عناصر سے سختی سے نمٹا جائے گا۔

انہوں نے کہا کہ تمام پولیس افسران الرٹ ڈیوٹی سر انجام دیں گے،سستی اور کوتاہی برداشت نہیں کی جائے گی، الیکشن کمیشن کی طرف سے جاری کردہ ضابطہ اخلاق اور ہدایات پر عملدرآمد کو یقینی بنایا جائے گا۔

یہ بھی پڑھنا مت بھولیں

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button