جہلم: میونسپل کمیٹی جہلم کی انتظامیہ کی غفلت، شہر کے چوک چوراہوں میں عارضی تجاوزات کے بعد قانون شکن افراد نے گلی محلوں میں پختہ تعمیرات شروع کردیں۔
تفصیلات کے مطابق شہر کے چوک چوراہوں سمیت گلی محلوں بازاروں میں قانون شکن افراد نے عارضی اور پختہ تجاوزات قائم کر لی ہیں جس کی وجہ سے شہریوں کو دشواری کا سامنا کرنا پڑرہاہے۔ بازاروں اور سڑکوں پر لوڈر رکشوں، چنگ چی رکشوں، ٹھیلوں کی رکاوٹ کیساتھ ساتھ نا جائز ٹھیئے لگا کر کارروبار کیا جا رہا ہے وہیں با اثر افراد نے میونسپل کمیٹی کی چشم پوشی اور مبینہ ملی بھگت سے پختہ تعمیرات کر لی ہیں۔
بااثر افراد نے گھروں کے باہر گلیوں ، بازاروں میں تھڑے قائم کرکے شہریوں کی آمدورفت میں مشکلات پیدا کررکھی ہیں جبکہ بازاروں میں دکانداروں نے کئی کئی فٹ شیڈ ز بڑھا رکھے ہیں ۔
شہر میں موجود نکاسی آب کے نالوں کو ختم کرکے بااثر افراد نے اپنی دکانوں اور گھروں میں شامل کرنا شروع کررکھا ہے ، نالے ختم ہونے کی وجہ سے بارشوں کے موسم میں بارشی پانی نکاسی آب کا مناسب انتظام نہ ہونے کیوجہ سے کئی کئی روز تک گلی محلوں اور سڑکوں پر جمع ہوجاتا ہے جس کیوجہ سے شہریوں کو آمدورفت میں شدید مشکلات کا سامنا کرنا پڑتا ہے۔
شہریوںنے چیف سیکرٹری پنجاب ، سیکرٹری بلدیات، محتسب پنجاب سے نوٹس لینے کا مطالبہ کیاہے۔
