جہلم: محرم الحرام کے دوران امن و امان کے قیام اور عزاداروں کو محفوظ ماحول کی فراہمی کے لیے کمشنر راولپنڈی ڈویژن انجینئر عامر خٹک اور آر پی او راولپنڈی ریجن بابر سرفراز الپا نے ضلع جہلم کا دورہ کیا۔
اس موقع پر ڈپٹی کمشنر جہلم میر رضا اوزگن، ڈسٹرکٹ پولیس آفیسر شفیق احمد چوہدری، متعلقہ سول و پولیس افسران اور دیگر حکام بھی موجود تھے۔
دورے کے دوران کمشنر راولپنڈی ڈویژن اور آر پی او راولپنڈی ریجن نے تحصیل دینہ میں تھانہ منگلا کینٹ کی حدود میں واقع اسد آباد میں جاری مجلس کا دورہ کیا اور وہاں کیے گئے انتظامی و سیکیورٹی انتظامات کا تفصیلی جائزہ لیا۔
حکام نے مجلس کے داخلی و خارجی راستوں، واک تھرو گیٹس، سیف سٹی اور سی سی ٹی وی مانیٹرنگ سسٹم، پولیس نفری کی تعیناتی، فیلڈ عملے کی موجودگی اور عزاداروں کی سہولت کے لیے کیے گئے انتظامات کا معائنہ کیا۔ اس موقع پر تعینات پولیس افسران اور اہلکاروں کی ڈیوٹی، حفاظتی اقدامات اور مجموعی سیکیورٹی پلان کا بھی باریک بینی سے جائزہ لیا گیا۔
ڈپٹی کمشنر جہلم میر رضا اوزگن نے کمشنر اور آر پی او کو محرم الحرام کے سلسلے میں ضلعی انتظامیہ کی جانب سے کیے گئے انتظامات، بین المحکمانہ رابطہ کاری، کنٹرول روم مانیٹرنگ، صفائی ستھرائی، طبی سہولیات، محرم سبیل کیمپوں، ریسکیو انتظامات اور عزاداروں کو فراہم کی جانے والی سہولیات کے حوالے سے تفصیلی بریفنگ دی۔
ڈی پی او جہلم شفیق احمد چوہدری نے ضلع بھر میں سیکیورٹی پلان، پولیس نفری کی تعیناتی، حساس مقامات کی نگرانی، سیف سٹی کیمروں، سی سی ٹی وی مانیٹرنگ، سرچ اینڈ سویپ آپریشنز اور دیگر حفاظتی اقدامات کے بارے میں آگاہ کرتے ہوئے بتایا کہ محرم الحرام کے دوران تمام جلوسوں اور مجالس کی مسلسل نگرانی کی جا رہی ہے اور پولیس مکمل طور پر الرٹ ہے۔
کمشنر راولپنڈی ڈویژن انجینئر عامر خٹک نے ہدایت کی کہ محرم الحرام کے دوران امن و امان، نظم و ضبط اور عوامی سہولیات کو ہر صورت یقینی بنایا جائے۔ انہوں نے متعلقہ اداروں کو ہدایت کی کہ وہ فیلڈ میں موجود رہتے ہوئے باہمی رابطے اور مؤثر حکمت عملی کے تحت اپنے فرائض انجام دیں تاکہ مجالس اور جلوس پرامن ماحول میں منعقد ہوں۔
انہوں نے مزید کہا کہ مجالس اور جلوسوں کی فول پروف سیکیورٹی کے لیے تمام دستیاب وسائل بروئے کار لائے جائیں، شرپسند عناصر پر کڑی نظر رکھی جائے اور کسی بھی ناخوشگوار واقعے کی روک تھام کے لیے ہر ممکن اقدامات کیے جائیں۔
دورے کے اختتام پر کمشنر راولپنڈی ڈویژن انجینئر عامر خٹک اور آر پی او راولپنڈی ریجن بابر سرفراز الپا نے ضلع جہلم میں کیے گئے سیکیورٹی اور انتظامی انتظامات پر اطمینان کا اظہار کرتے ہوئے ضلعی انتظامیہ، پولیس، ریسکیو 1122، محکمہ صحت، سول ڈیفنس اور دیگر متعلقہ اداروں کو ہائی الرٹ رہنے، مؤثر مانیٹرنگ جاری رکھنے اور عزاداروں کو ہر ممکن سہولیات فراہم کرنے کی ہدایت کی۔
کمشنر راولپنڈی ڈویژن نے اس عزم کا اعادہ کیا کہ محرم الحرام کے دوران امن و امان کے قیام، مذہبی ہم آہنگی کے فروغ، مجالس اور جلوسوں کی فول پروف سیکیورٹی اور عزاداروں کو محفوظ ماحول فراہم کرنے کے لیے تمام دستیاب وسائل ہر صورت بروئے کار لائے جائیں گے۔
