دینہ: جہلم کی تحصیل دینہ میں ماحولیاتی آلودگی اور سموگ کے نقصانات سے بچاؤ کے لیے محکمہ صحت کے زیر اہتمام ڈی ڈی ایچ او ارشاد تونیو کی زیر قیادت آگاہی واک کا انعقاد کیا گیا۔
واک میں محکمہ صحت کے حکام اور سماجی شخصیات نے شرکت کی جبکہ اسسٹنٹ کمشنر دینہ سعدیہ ڈوگر نے بھی خصوصی شرکت کی۔ انہوں نے شہریوں کو حفاظتی اقدامات اپنانے کی ضرورت پر زور دیتے ہوئے کہا کہ سموگ اور آلودگی سے بچاؤ کے لیے احتیاطی تدابیر اختیار کرنا نہایت ضروری ہیں۔
میڈیا سے بات کرتے ہوئے اسسٹنٹ کمشنر دینہ اور ڈی ڈی ایچ او کا کہنا تھا کہ حکومت پنجاب نے پنجاب بھر میں سموک اور آلودگی کے نقصانات اور احتیاطی تدابیر کے لیے آگاہی پمفلٹ اور ماسک تقسیم کرنے کی مہم شروع کر رکھی ہے تاکہ اس کے نقصانات سے عوام کو بچایا جا سکے۔ لہٰذا عوام کو بھی چاہیے کہ احتیاط کریں۔
انہوں نے کہا کہ شہری دھواں چھوڑنے والی گاڑیوں سے دور رہیں، سموک کی وجہ سے گھروں سے کم نکلیں اور اگر گھر سے نکلنا نہایت ہی ضروری ہو تو ماسک کا استعمال ضرور کریں تاکہ اس سموک کی وجہ سے نزلہ زکام اور پھیپھڑوں کے امراض سے محفوظ رہ سکیں۔
واک کے اختتام پر شہریوں میں آگاہی پمفلٹس اور ماسک بھی تقسیم کیے گئے تاکہ وہ حفاظتی تدابیر کو اپنائیں اور آلودگی کے اثرات سے محفوظ رہ سکیں۔
