جہلم شہر میں چنگ چی رکشہ ڈرائیوروں کی مبینہ من مانی، زائد کرایوں کی وصولی، ٹریفک قوانین کی خلاف ورزی اور مسافروں، خصوصاً خواتین اور بزرگ شہریوں سے نامناسب رویے کے خلاف عوامی شکایات میں اضافہ ہو گیا ہے۔
رپورٹ کے مطابق جہلم میں شاندار چوک سے بلال ٹاؤن، جادہ، جہلم کینٹ، پولیس لائن، کریم پورہ، اسلامیہ اسکول اور محمدی چوک سمیت مختلف روٹس پر چلنے والے چنگ چی رکشہ ڈرائیور مبینہ طور پر من مانے کرائے وصول کر رہے ہیں۔
شہریوں کا کہنا ہے کہ جن روٹس پر پہلے فی سواری 50 روپے کرایہ وصول کیا جاتا تھا، وہاں اب 150 روپے تک وصول کیے جا رہے ہیں، جس سے مہنگائی کے ستائے عوام کو شدید مالی مشکلات کا سامنا ہے۔
متاثرہ شہریوں کا کہنا ہے کہ اگر کوئی مسافر زائد کرایہ دینے سے انکار کرے تو بعض رکشہ ڈرائیور بدتمیزی، تلخ کلامی اور جھگڑے پر اتر آتے ہیں، جبکہ خواتین اور بزرگ شہریوں کے ساتھ بھی نامناسب رویہ اختیار کیا جاتا ہے، جس پر عوام میں شدید غم و غصہ پایا جاتا ہے۔
شہریوں کے مطابق متعدد چنگ چی رکشہ ڈرائیور سڑکوں کے درمیان رکشے کھڑے کر کے سواریاں بٹھاتے ہیں، جس سے ٹریفک کی روانی متاثر ہوتی ہے اور حادثات کے امکانات بڑھ جاتے ہیں۔ ان کا کہنا ہے کہ بے ہنگم اور تیز رفتار ڈرائیونگ کے باعث آئے روز حادثات پیش آ رہے ہیں، جن میں قیمتی انسانی جانوں کے ضائع ہونے کا بھی خدشہ رہتا ہے۔
عوامی حلقوں نے مؤقف اختیار کیا کہ متعلقہ ادارے، بالخصوص ریجنل ٹرانسپورٹ اتھارٹی (RTA) اور دیگر ذمہ دار حکام اس صورتحال کے تدارک کے لیے مؤثر اقدامات کرتے دکھائی نہیں دے رہے، جس کے باعث مسائل میں مسلسل اضافہ ہو رہا ہے۔
شہریوں نے ڈپٹی کمشنر جہلم، ڈی پی او جہلم، ڈی ایس پی ٹریفک اور دیگر متعلقہ حکام سے مطالبہ کیا ہے کہ چنگ چی رکشہ ڈرائیوروں کے خلاف بلاامتیاز کریک ڈاؤن کیا جائے، کرایوں کی باقاعدہ فہرست جاری کر کے اس پر سختی سے عمل درآمد کرایا جائے، ٹریفک قوانین کی خلاف ورزی کرنے والوں کے خلاف قانونی کارروائی کی جائے اور شہریوں کو محفوظ، منظم اور مناسب کرایوں پر سفری سہولیات فراہم کی جائیں۔
