دینہ: اسسٹنٹ کمشنر دینہ صفاء عابد نے شہر میں غیر قانونی تجاوزات کے خاتمے کے لیے دوکانداروں کو 2 روز کی مہلت دے دی۔ انہوں نے واضح کیا کہ مین بازار، منگلا روڈ، داتا روڈ سمیت دیگر مقامات پر قائم غیر قانونی پختہ تھڑے، ٹھیے، دیواریں اور سائن بورڈز فوری طور پر ہٹائے جائیں، بصورتِ دیگر سخت قانونی کارروائی عمل میں لائی جائے گی۔
اسسٹنٹ کمشنر صفاء عابد نے دینہ شہر کا دورہ کیا اور مختلف بازاروں میں غیر قانونی تجاوزات کا جائزہ لیا۔ اس دوران انہوں نے دوکانداروں کو ہدایت دی کہ وہ اپنی دوکانوں کے اندر رہ کر کاروبار کریں، شٹر سے باہر سامان رکھنے یا راستہ روکنے کی اجازت نہیں دی جائے گی۔
اس موقع پر چیف آفیسر میونسپل کمیٹی دینہ گلشن نورین، تحصیلدار دینہ شمشیر حیدر رانجھا، ہیڈ کلرک میاں سہیل سمیت دیگر متعلقہ عملہ بھی ان کے ہمراہ تھا۔ اسسٹنٹ کمشنر نے میونسپل کمیٹی کو ہدایت جاری کی کہ شہر میں صفائی کی صورتحال بہتر بنائی جائے، خاص طور پر نالیوں کی صفائی پر خصوصی توجہ دی جائے۔
انہوں نے مزید کہا کہ تمام دوکاندار 2 دن کے اندر اپنی تجاوزات ختم کریں، بصورت دیگر انہیں از خود ہٹا دیا جائے گا اور خلاف ورزی کرنے والوں کے خلاف سخت ایکشن لیا جائے گا۔ اس کے ساتھ ساتھ شہر میں خوبصورتی اور یکسانیت برقرار رکھنے کے لیے تمام دوکانوں کے سائن بورڈ ایک جیسے بنانے کا حکم بھی جاری کر دیا گیا ہے۔
اسسٹنٹ کمشنر صفاء عابد نے واضح کیا کہ تجاوزات کے خاتمے کے بعد دینہ شہر میں ٹریفک کی روانی بہتر ہوگی اور عوام کو پیدل چلنے میں سہولت میسر آئے گی۔ انہوں نے تاجروں اور شہریوں سے بھی تعاون کی اپیل کرتے ہوئے کہا کہ تجاوزات کے خاتمے میں انتظامیہ کا ساتھ دیں تاکہ شہر کو خوبصورت اور منظم بنایا جا سکے۔
