جہلم: وزیر مملکت برائے خزانہ و ریلوے بلال اظہر کیانی نے آزاد جموں و کشمیر قانون ساز اسمبلی کے ضمنی انتخابات کے سلسلے میں مسلم لیگ (ن) کے امیدواروں کی انتخابی مہم میں حصہ لیتے ہوئے کہا ہے کہ پیپلز پارٹی آزاد کشمیر کی انتخابی مہم میں اپوزیشن جیسی تقاریر کر کے اپنی ہی حکومت کے فیصلوں کی نفی کر رہی ہے۔
وزیر مملکت نے حلقہ ایل اے-42 ویلی 3 کے امیدوار سید شوکت شاہ اور حلقہ ایل اے-39 جموں 6 کے امیدوار راجہ صدیق کے ہمراہ بنگلہ اسد آباد، شیخوپور (یونین کونسل لدھڑ)، مغل آباد اور ڈومیلی میں کارنر میٹنگز، عوامی اجتماعات اور مختلف برادریوں کے عمائدین سے ملاقاتیں کیں۔
اس موقع پر مختلف برادریوں اور مقامی شخصیات نے مسلم لیگ (ن) کے امیدواروں کی حمایت کا اعلان کیا، جبکہ بنگلہ اسد آباد میں پیر آغا عباس جان اور پیر سید شیر بادشاہ سمیت دیگر معززین سے بھی ملاقات کی گئی۔
عوامی اجتماعات سے خطاب کرتے ہوئے بلال اظہر کیانی نے کہا کہ پاکستان اور کشمیر کا رشتہ قربانیوں، محبت اور مشترکہ تاریخ پر قائم ہے۔ انہوں نے کہا کہ پاکستانیوں اور کشمیریوں نے ہمیشہ ایک دوسرے کے لیے قربانیاں دی ہیں اور بھارت کے خلاف جنگوں میں بھی شانہ بشانہ کھڑے رہے ہیں۔
انہوں نے کہا کہ "جہلم میرپور ہے اور میرپور جہلم ہے” کیونکہ جہلم کے بیٹوں نے بھی کشمیر کے لیے اپنی جانوں کا نذرانہ پیش کیا۔ ان کا کہنا تھا کہ کشمیری مہاجرین کی نمائندگی کے بغیر نہ آزاد کشمیر مکمل ہے اور نہ ہی پاکستان، جبکہ تمام مسائل کا حل جمہوری مکالمے اور پارلیمنٹ کے فورم پر ہی ممکن ہے۔
وزیر مملکت نے کہا کہ پاکستان اور آزاد کشمیر میں ترقی کا ہر دور مسلم لیگ (ن) اور میاں نواز شریف کی قیادت سے وابستہ رہا ہے۔ ان کے بقول مسلم لیگ (ن) عوام کی خدمت اور مسئلہ کشمیر کے حل کے لیے اپنا کردار آئندہ بھی جاری رکھے گی۔
بلال اظہر کیانی نے اپنی تقریر میں کہا کہ پیپلز پارٹی آزاد کشمیر کی انتخابی مہم میں اپوزیشن والی تقاریر کر رہی ہے، حالانکہ وہ خود حکومت میں ہے، اس لیے اس کا طرزِ عمل اپنی ہی حکومت کے فیصلوں کی نفی کے مترادف ہے۔ انہوں نے دعویٰ کیا کہ عوام کی طاقت اور ووٹ کے ذریعے ہی کشمیر کے مسائل کا حل ممکن ہے اور مسلم لیگ (ن) اس مقصد کے لیے اپنی جدوجہد جاری رکھے گی۔
