دینہ: اسسٹنٹ کمشنر دینہ صفاء عابد نے ڈپٹی کمشنر جہلم میثم عباس کی خصوصی ہدایت پر دینہ کے مختلف فلور ملز اور ہوٹلوں کا اچانک دورہ کیا۔ اس موقع پر محکمہ فوڈ کے انسپکٹر مدثر اور اویس بھی ان کے ہمراہ تھے۔
تفصیلات کے مطابق اے سی دینہ نے منگلا روڈ اور جی ٹی روڈ پر قائم فلور ملز کا معائنہ کیا، جہاں گندم اور آٹے کے سٹاک کی صورتحال کو چیک کیا گیا۔
فلور مل مالکان کو سختی سے ہدایت کی گئی کہ گندم کا سٹاک مقررہ مقدار کے مطابق موجود ہونا چاہئے اور آٹے کی کوالٹی اور قیمتوں میں کسی قسم کی خلاف ورزی برداشت نہیں کی جائے گی۔ عوامی شکایات اور مارکیٹ میں آٹے کی بڑھتی ہوئی قیمتوں پر حکومت پنجاب کی واضح ہدایات ہیں جن پر ہر حال میں عمل درآمد یقینی بنایا جائے گا۔
بعد ازاں اے سی دینہ صفاء عابد نے نکودر، بوہڑیاں اور شیخوپور کے مختلف ہوٹلوں پر اچانک چھاپے مارے اور صفائی کے انتظامات اور ریٹ لسٹوں کا جائزہ لیا۔ اس دوران بعض ہوٹلوں کو ناقص صفائی اور مہنگے داموں اشیاء فروخت کرنے پر جرمانے کیے گئے جبکہ متعدد کو سخت وارننگ جاری کی گئی۔
اسسٹنٹ کمشنر دینہ کا کہنا تھا کہ عوام کو ریلیف فراہم کرنا اولین ترجیح ہے اور ذخیرہ اندوزی، ملاوٹ یا ناجائز منافع خوری کسی صورت برداشت نہیں کی جائے گی۔
