اسٹیٹ بینک نے نئے کرنسی نوٹوں کے ڈیزائن کے لیے آرٹ مقابلے کے انعقاد کا فیصلہ کرلیا، مقابلے میں حصہ لینے والے تمام اُمیدوار آئندہ ماہ11 مارچ تک اپنے ڈیزائن اسٹیٹ بینک کو بھیج سکتے ہیں۔
تفصیلات کے مطابق اسٹیٹ بینک آف پاکستان نے پہلی بار نئے کرنسی نوٹوں کے ڈیزائن کے لئے عوام سے رائے مانگ لی۔
اسٹیٹ بینک کی جانب سے نئے نوٹوں کے ڈیزائن کے لیے آرٹ مقابلے ہونے جارہے ہیں، آرٹ مقابلے میں آرٹسٹ، ڈیزائنرز اور آرٹ کے طلبہ حصہ لینے کے اہل ہیں۔
ترجمان اسٹیٹ بینک کی جانب سے کہا گیا ہے کہ تمام مالیت کے نئے کرنسی نوٹ کے اجراء پر کام جاری ہے ، آرٹ مقابلے میں آرٹسٹ مختلف تھیمز پرڈیزائن تیار کرسکتے ہیں۔
ترجمان کا کہنا تھا کہ مختلف مالیت کے ہر نوٹ کےلیے تین ڈیزائن منتخب کئےجائیں گے، جنھیں پروفیشنل بینک نوٹ ڈیزائنرز کی مدد سےحتمی شکل دی جائے گی۔
اسٹیٹ بینک کے مطابق جس کے بعد ڈیزائن حکومت پاکستان کی منظوری کے لیے بھیجا جائے گا ،آرٹ مقابلے میں حصہ لینے والے تمام اُمیدوار آئندہ ماہ گیارہ مارچ تک اپنے ڈیزائن اسٹیٹ بینک کو بھیج سکتے ہیں۔
