پنڈدادنخان: چوہدری زبیر جمیل نے کہا کہ پنڈدادنخان میں تاجروں پر بھاری ٹیکس نا منظور، پروفیشنل ٹیکس کے نام پر تاجروں کو ہزاروں روپے کے نوٹس تھما دئے گئے، تاجر خود کشیاں کرنے پر مجبور ہیں۔ میونسپل کمیٹی پنڈدادنخان اور محکمہ ایکسائز کی طرف سے بھاری ٹیکسوں کی بھر مار سے تاجر پریشان ہیں۔
انجمن تاجران پنڈدادنخان کے صدر چوہدری زبیر جمیل نے میڈیا سے گفتگو کرتے ہوئے کہا کہ محکمہ ایکسائز اینڈ ٹیکسیشن ہوش کے ناخن لے، محکمہ ایکسائز کی طرف سے تاجروں کو پروفیشنل ٹیکس کے نام پر لاکھوں روپے کا بوجھ ڈال دیا گیا۔ یہ ٹیکس پہلے صرف ڈاکٹرز سے وصول کیا جاتا تھا لیکن اب چائے کے ڈھابے والے کو بھی ہزاروں روپے کے نوٹس دے دئیے گئے۔
انہوں نے کہا کہ للِہ تا جہلم ڈیول کیرج وے کی تعمیر میں تاخیر سے کاروبار ختم ہوگئے، تاجر پہلے ہی فاقہ کشی پر مجبور ہیں۔ محکمہ ایکسائز کی طرف سے پروفیشنل ٹیکس کے نام پر گزشتہ 6 سالوں کے ہزاروں روپے کے ٹیکس نوٹس دئیے جا رہے جس سے تاجر ذہنی مریض ہو گئے ہیں۔ مہنگائی کے اس دور میں بغیر سروے کے ظالمانہ ٹیکس سے تاجر خود کشیاں کرنے پر مجبور ہے۔
چوہدری زبیر جمیل نے کہا کہ وزیراعلیٰ پنجاب مریم نواز اور ڈپٹی کمشنر جہلم میثم عباس فوری نوٹس لے کر محکمہ ایکسائز اور میونسپل کمیٹی پنڈدادنخان کو ناجائز ٹیکس وصولی کا عمل فوری روکیں، بصورت دیگر شٹرڈاؤن ہڑتال اور وزیراعلیٰ ہاؤس کے سامنے دھرنا دیا جائے گا۔
