جہلم: ڈپٹی کمشنر میر رضا اوزگن کی خصوصی ہدایت پر ایڈیشنل ڈپٹی کمشنر ریونیو سنیہ صافی کی زیر صدارت فائر سیفٹی انتظامات کا جائزہ لینے کے لیے ایک اہم اجلاس منعقد ہوا۔ اجلاس میں ریسکیو 1122، سول ڈیفنس، میونسپل کمیٹی اور دیگر متعلقہ محکموں کے افسران نے شرکت کی۔
اجلاس کے دوران ضلع بھر کی بلند و بالا عمارات، پیٹرول پمپس اور تجارتی مراکز میں آتشزدگی سے بچاؤ کے آلات کی دستیابی اور فعالیت کا تفصیلی جائزہ لیا گیا۔
سنیہ صافی نے خطاب کرتے ہوئے کہا کہ عوامی تحفظ کو یقینی بنانا تمام اداروں کی مشترکہ ذمہ داری ہے اور اس ضمن میں کسی بھی قسم کی غفلت برداشت نہیں کی جائے گی۔ انہوں نے ہدایت کی کہ تمام محکمے اپنی حدود میں واقع کمرشل عمارات کا فوری معائنہ کریں اور جہاں فائر سیفٹی آلات غیر فعال یا موجود نہ ہوں وہاں بلا تاخیر قانونی کارروائی عمل میں لائی جائے۔
اجلاس میں یہ بھی فیصلہ کیا گیا کہ تمام متعلقہ محکمے باہمی تعاون سے آگاہی مہمات اور موک ڈرلز کا انعقاد کریں گے تاکہ کسی بھی ہنگامی صورتحال میں جانی و مالی نقصان کے خدشات کو کم سے کم کیا جا سکے۔
سنیہ صافی نے واضح کیا کہ عمارتوں کے نقشوں میں فائر ایگزٹ کی موجودگی کو لازمی قرار دیا جائے گا تاکہ شہریوں کو محفوظ اور پرامن ماحول فراہم کیا جا سکے۔
