جہلم شہر اور گردونواح میں جشنِ آزادی کی تیاریاں عروج پر پہنچ گئیں۔ گلیوں، محلوں، بازاروں، چوک چوراہوں، تعلیمی اداروں، سرکاری و نجی عمارتوں اور گھروں کو سبز و سفید جھنڈیوں، قومی پرچموں اور برقی قمقموں سے خوبصورتی کے ساتھ سجا دیا گیا ہے۔
شہریوں میں یومِ آزادی کے حوالے سے جوش و خروش دیدنی ہے۔ اندرون شہر کے بازاروں میں آزادی کے اسٹالز سج چکے ہیں، جہاں قومی پرچم، بیجز، سبز و سفید چوڑیاں، کپڑے، بچوں کے ملبوسات، ماسک اور دیگر قومی رنگوں سے مزین اشیاء فروخت ہو رہی ہیں۔ دکانداروں کے مطابق اس سال جشنِ آزادی کے لیے وافر اسٹاک منگوایا گیا ہے اور خریداروں کا رش دن بہ دن بڑھ رہا ہے۔
نوجوان اور بچے جوش و خروش سے آزادی کے حوالے سے اشیاء خرید کر گھروں کو سجا رہے ہیں۔ دوسری جانب تعلیمی اداروں میں بھی تقریبات کی تیاریاں زور و شور سے جاری ہیں۔ اسکولوں میں ملی نغمے، تقاریر، خاکے، اور پرچم کشائی کی تقریبات منعقد کی جا رہی ہیں۔ کئی اسکولوں نے 14 اگست کے لیے رنگا رنگ ثقافتی و تعلیمی پروگرام ترتیب دیے ہیں، جن میں بچوں کی شرکت کو یقینی بنایا جا رہا ہے۔
شہر کا ہر کونہ قومی جذبے اور حب الوطنی کے رنگ میں رنگا جا چکا ہے اور 14 اگست کو یومِ آزادی کو شان و شوکت سے منانے کے لیے بھرپور تیاریوں کا سلسلہ جاری ہے۔
