جہلم: ڈپٹی کمشنر جہلم میثم عباس نے کہا ہے کہ نئے کرش پلانٹس کی منظوری تمام قانونی تقاضے مکمل کرنے کے بعد ہی دی جائے گی اور ماحول دشمن اقدامات کو کسی صورت برداشت نہیں کیا جائے گا۔
وہ محکمہ ماحولیات کے زیر اہتمام منعقدہ اجلاس کی صدارت کر رہے تھے، جس میں ضلع میں چھ نئے کرش پلانٹس لگانے کی درخواستوں کا جائزہ لیا گیا۔
ڈپٹی کمشنر میثم عباس کے مطابق ان درخواستوں میں سے جن کیسز نے قانونی تقاضے اور ماحولیاتی اصول مکمل کیے، انہیں اجازت نامے جاری کر دیے گئے، جبکہ جن کیسز میں دستاویزات مکمل نہ تھیں یا اعتراضات موجود تھے، انہیں مؤخر کر دیا گیا۔
انہوں نے کہا کہ ضلع میں ترقیاتی سرگرمیاں ضروری ہیں لیکن ان کے ساتھ عوام کی صحت اور ماحول کے تحفظ کو بھی یقینی بنانا ہوگا۔ ماحول کو نقصان پہنچانے والے کسی بھی اقدام کے خلاف سخت کارروائی عمل میں لائی جائے گی۔
