جہلم پولیس نے سرچ آپریشن کے دوران منشیات فروش، ناجائز اسلحہ رکھنے والے ملزمان اور 2 اشتہاری ملزمان کو گرفتار کر لیا۔
رپورٹ کے مطابق جہلم پولیس کی جانب سے جرائم پیشہ عناصر کے خلاف بھرپور کریک ڈاؤن اور سرچ آپریشنز کا سلسلہ جاری ہے۔ اسی سلسلے میں تھانہ چوٹالہ پولیس نے سرچ آپریشن کے دوران کارروائی کرتے ہوئے منشیات فروشی اور ناجائز اسلحہ رکھنے کے مقدمات میں ملوث ملزمان سمیت 2 اشتہاری مجرمان کو گرفتار کر لیا۔
ترجمان جہلم پولیس کے مطابق کارروائی کے دوران گرفتار ملزمان کے قبضہ سے ایک کلاشنکوف، پسٹل 30 بور معہ ایمونیشن اور ایک کلو 950 گرام چرس برآمد کی گئی، جبکہ پولیس نے دو اشتہاری مجرمان کو بھی گرفتار کیا۔
پولیس کے مطابق گرفتار ملزمان کے خلاف ناجائز اسلحہ، منشیات اور دیگر متعلقہ دفعات کے تحت الگ الگ مقدمات درج کر لیے گئے ہیں جبکہ ملزمان سے مزید تفتیش جاری ہے۔
ڈی پی او جہلم شفیق احمد چوہدری نے کہا کہ جرائم پیشہ عناصر کے خلاف بلاامتیاز کارروائیوں کا سلسلہ جاری رکھا جائے گا۔ انہوں نے کہا کہ شہریوں کے جان و مال کا تحفظ جہلم پولیس کی اولین ترجیح ہے اور امن و امان کو یقینی بنانے کے لیے تمام ممکنہ اقدامات کیے جا رہے ہیں۔
