جہلم: تھانہ سول لائنز پولیس کی بڑی کارروائی، مرغوں کی لڑائی پر جوا کھیلنے والے 12 ملزمان کو گرفتار کر کے نقدی، موبائل فونز اور قمار بازی کا سامان برآمد کر لیا گیا۔
تفصیلات کے مطابق جہلم میں تھانہ سول لائنز پولیس نے قماربازی کے خلاف ایک بڑی کارروائی کرتے ہوئے 12 ملزمان کو رنگے ہاتھوں گرفتار کر لیا۔ ملزمان مرغوں کی لڑائی پر جوا کھیل رہے تھے۔ کارروائی ایس ایچ او تھانہ سول لائنز اور ان کی ٹیم نے کی۔
گرفتار ہونے والے ملزمان میں شفاعت، محمد عبداللہ، دانش وقاص، احمد بلال، اسامہ، ابوبکر، ابرار، بلال احمد، کلیم اللہ، شمس بن خالد، حسن رضا اور نواس شامل ہیں۔
پولیس نے ملزمان سے داؤ پر لگی ہوئی رقم 90 ہزار 330 روپے، 11 عدد موبائل فونز، 2 عدد مرغے معہ 24 لوہے کے نوکیلے کیل اور دیگر قماربازی کے آلات برآمد کر لیے۔ کل جوا لاگت کا تخمینہ تقریباً 4 لاکھ 10 ہزار 330 روپے لگایا گیا ہے۔
ملزمان کے خلاف انسداد قمار بازی ایکٹ کے تحت مقدمہ درج کر لیا گیا ہے جبکہ مزید تفتیش جاری ہے۔
ڈی پی او جہلم طارق عزیز سندھو نے کارروائی کو سراہتے ہوئے کہا کہ قمار بازی نہ صرف معاشرتی برائیوں کی جڑ ہے بلکہ یہ جرائم کے فروغ کا ایک بڑا سبب بھی ہے۔ انہوں نے مزید کہا کہ جہلم پولیس ایسے جرائم کے خاتمے کے لیے مؤثر اور مسلسل کارروائیاں جاری رکھے گی۔
